ദുബായിൽനിന്നും ഷാർജയിലേക്ക് ഫെറി സർവ്വീസ്; അറിയേണ്ടതെല്ലാം

ദുബായ്: ഷാർജയിലേക്ക് കടത്തുബോട്ട് സർവ്വീസുമായി ദുബായ് റോഡ്സ് ആന്റ് ട്രാൻസ്പോർട്ട് അതോറിറ്റി (ആർടിഎ). ദുബായ് അൽ ഗുബൈ മറൈൻ സ്റ്റേഷനിൽനിന്നും ഷാർജ അക്വേറിയം മറൈൻ സ്റ്റേഷനിലേക്കാണ് സർവ്വീസ്. ഓരോ അരമണിക്കൂറും ഇടവിട്ട് ദിവസം 42 സർവ്വീസുകളാണ് നടത്തുന്നത്. 35 മിനിറ്റ് ദൈർഘ്യമുള്ള യാത്രയ്ക്ക് 15 (സിൽവർ ക്ലാസ്), 25 (ഗോൾഡ് ക്ലാസ്) ദിർഹം വീതമാണ് ടിക്കറ്റ് നിരക്ക്. പ്രത്യേക പരിഗണന ലഭിക്കേണ്ടവർക്കും അഞ്ച് വയസിൽ താഴെയുള്ള കുട്ടികൾക്കും യാത്ര സൗജന്യമായിരിക്കും.

പ്രതിവർഷം 13 ലക്ഷം യാത്രക്കാർക്ക് ഫെറി സർവ്വീസ് ഉപയോഗിക്കാം. യാത്രക്കാരുടെ എണ്ണം കൂടുകയാണെങ്കിൽ സർവ്വീസ് വർദ്ധിപ്പിക്കും. നിലവിൽ അൽ ഗുബൈബ, മറീന മാൾ, ജദ്ദാഫ്, വാട്ടർ കനാൽ, ശൈഖ് സായിദ് റോഡ്, വാട്ടർ ഫ്രണ്ട്, മറാസി, ദുബായ് ഡിസൈൻ ഡിസ്ട്രിക്ട് സ്റ്റേഷനുകളിൽനിന്നും ഒമ്പത് സർവ്വീസുകൾ നടത്തുന്നുണ്ട്.

യാത്രക്കാരുടെ സുരക്ഷയ്ക്കായി ഉയർന്ന നിലവാരത്തിലുള്ള ക്രമീകരണങ്ങളാണ് ഉറപ്പാക്കിയിരിക്കുന്നത്. രാജ്യേന്തര സുരക്ഷാ അംഗീകാരമുള്ള കടത്തുബോട്ടുകളാണ് സർവ്വീസിനായി ഉപയോഗിക്കുന്നത്- ആർടിഎ ചെയർമാൻ മതാർ അൽ തായർ പറഞ്ഞു.


സമയക്രമം

ഷാർജയിൽനിന്നും രാവിലെ അഞ്ചുമണിക്ക് ഫെറി സർവ്വീസ് ആരംഭിക്കും. ദുബായിൽനിന്നും 5.15നായിരിക്കും സർവ്വീസ് ആരംഭിക്കുക. ദുബായിൽനിന്നുള്ള അവസാനത്തെ സർവ്വീസ് എട്ടുമണിക്കും ഷാർജയിൽനിന്നും വൈകിട്ട് 7.30നുമായിരിക്കും പുറപ്പെടുക.

കാത്തിരിപ്പുകേന്ദ്രം, യാത്രാ സുരക്ഷ

സ്ത്രീകൾക്കും കുട്ടികൾക്കും, പുരുഷന്മാർക്കുമായി പ്രത്യേകം കാത്തിരിപ്പുകേന്ദ്രങ്ങൾ. ശുചിമുറികൾ, ടിക്കറ്റ് കൗണ്ടറുകൾ, ടിക്കറ്റ് വൈൻഡിങ് മെഷീനുകൾ എന്നിവയും സജ്ജീകരിച്ചിട്ടുണ്ട്. പരിചയസമ്പന്നരായ ജീവനക്കാർ, രക്ഷാ പ്രവർത്തകർ, അഗ്നിശമന ഉപകരണങ്ങൾ എന്നിവയും സജ്ജമാണ്. 125 യാത്രക്കാരെ ഉൾക്കൊള്ളാൻ കഴിയുന്ന രക്ഷാ ബോട്ടുകളും, 110 ലൈഫ് ജാക്കറ്റുകൾ, കടലിന്റെ ആഴം അഴക്കാനുള്ള സംവിധാനം, മറൈൻ റഡാർ, ഇലക്ട്രോണിക് മാപ്പ്, നിരീക്ഷണ ഉപകരണങ്ങളും ഫെറി സർവ്വീസിനോടനുബന്ധിച്ച് ഒരുക്കിയിട്ടുണ്ട്.

ഫെറി സർവ്വീസ് പ്രോത്സാഹിപ്പിക്കുന്നതിന്റെ ഭാഗമായി 300 വാഹനങ്ങൾ പാർക്ക് ചെയ്യുന്നതിനുള്ള സൗകര്യം അക്വേറിയം മറൈൻ സ്റ്റേഷനിൽ ഒരുക്കിയിട്ടുണ്ട്. ഫെറി സർവ്വീസ് ദുബായ് മെട്രോ, ബസ്, ടാക്സി എന്നിവയുമായി ബന്ധിപ്പിക്കും. ഷാർജ മറൈൻ സ്റ്റേഷനിൽനിന്നും വിവിധ ഭാഗങ്ങളിലേക്ക് ബസ് സർവ്വീസ് ഏർപ്പെടുത്തും. അൽ മജാസിലൂടെ കോർണിഷ് വഴിയായിരിക്കും സർവ്വീസ്.