യുഎയില്‍ കനത്ത മഴ; ജനജീവിതം സതംഭിച്ചു

അബുദാബി: കുവൈത്തിനും സൗദി അറേബ്യയ്ക്കും പിന്നാലെ യുഎയിലും കനത്ത മഴ. നിര്‍ത്താതെ പെയ്ത മഴയില്‍ റോഡ് ഗതാഗതം പൂര്‍ണമായും സ്തംഭിച്ചു. മഴയ്ക്ക് പിന്നാലെ റോഡില്‍ വെള്ളക്കെട്ട് രൂപപ്പെട്ടതാണ് ഗതാഗതം സ്തംഭിക്കാന്‍ ഇടയാക്കിയത്. ജനങ്ങളെ ഇത് ദുരിതത്തിലാക്കി. മഴ നാളെയും തുടരുമെന്നാണ് കാലാവസ്ഥാ നിരീക്ഷണ കേന്ദ്രം നല്‍കുന്ന മുന്നറിയിപ്പ്.


സ്കൂളുകളില്‍ എത്തിച്ചേരാന്‍ കുട്ടികള്‍ക്ക് കഴിയുന്നില്ല. പല സ്കൂളുകളിലും ഹാജര്‍നില വളരെ കുറവാണ്. നഗരപ്രദേശങ്ങളെയാണ് കനത്ത മഴ കൂടുതലായും ബാധിച്ചത്. അതേസമയം വടക്കന്‍ മലയോര പ്രദേശങ്ങളിലും തെക്കുകിഴക്കന്‍ പ്രദേശങ്ങളിലും നല്ല മഴ ലഭിച്ചിട്ടുണ്ട്. റോഡില്‍ വെള്ളക്കെട്ടുണ്ടാകുന്നതും മഴയില്‍ ദൂരക്കാഴ്ച കുറയുന്നതും റോഡ് ഗതാഗതത്തെ ദോഷകരമായി ബാധിക്കുന്നുണ്ട്. വാഹനമോടിക്കുന്നവര്‍ ജാഗ്രത പാലിക്കണമെന്നും കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കി.