ഹോം ക്വാറന്റൈന്‍ ആവശ്യമില്ല
ബഹ്‌റൈനില്‍ വിമാനത്താവളത്തില്‍ എത്തുമ്പോള്‍ നടത്തുന്ന പിസിആര്‍ പരിശോധനയില്‍ നെഗറ്റീവ് ആകുന്നവര്‍ക്ക് ഇനി മുതല്‍ ഹോം ക്വാറന്റൈന്‍ ആവശ്യമില്ല. എന്നാല്‍, കൊവിഡ് ലബോറട്ടറി പരിശോധന നടത്തുന്നത് തുടരും. പത്ത് ദിവസം കഴിഞ്ഞാല്‍ ആയിരിക്കും വീണ്ടും പരിശോധന നടത്തുക. സന്ദര്‍ശ വിസയിലെത്തി പത്ത് ദിവസത്തിനുള്ളില്‍ ബഹ്‌റൈനില്‍ നിന്ന് തിരിച്ചു പോകുന്നവര്‍ക്ക് രണ്ടാമത്തെ ടെസ്റ്റ് ആവശ്യമില്ല.
യാത്രക്കാരില്‍ 0.2 % പേര്‍ക്ക് കൊവിഡ്
ബഹ്‌റൈനില്‍ പത്ത് ദിവസത്തെ നിരീക്ഷണത്തില്‍ കഴിഞ്ഞ യാത്രക്കാരില്‍ 0.2 ശതമാനം പേര്‍ക്ക് മാത്രമാണ് കൊവിഡ് പോസിറ്റീവായത്. ഇതേതുടര്‍ന്നാണ് ദേശീയ ആരോഗ്യ കര്‍മ്മ സമിതിയുടെ പുതിയ തീരുമാനം. ജൂലായ് 1 മുതല്‍ ഓഗസ്റ്റ് 16 വരെ ബഹ്‌റൈനിലെത്തിയ യാത്രക്കാരില്‍ നടത്തിയ പരിശോധനയുടെ അടിസ്ഥാനത്തിലാണ് ഇനി മുതല്‍ നിരീക്ഷണം വേണ്ടെന്ന് വച്ചത്. യാത്രക്കാരെ വിമാനത്താവളത്തില്‍ വെച്ചും 10 ദിവസത്തിനു ശേഷം നിശ്ചിത കേന്ദ്രങ്ങളിലും വെച്ച് പരിശോധന നടത്തും.
പരിശോധനയ്ക്ക് 10,000 രൂപ
ജൂലായ് 20 മുതല്‍ ബഹ്‌റൈനില്‍ മാറ്റം വരുത്തിയ കൊവിഡ് ടെസ്റ്റുകളില്‍ ഈടാക്കുന്നതില്‍ മാറ്റം. രണ്ട് കൊവിഡ് ടെസ്റ്റുകള്‍ക്കായി 30 ബഹ്‌റൈന്‍ ദിനാര്‍ വീതം 60 ദിനാര്‍ അതായത്, പതിനായിരം രൂപയോളം യാത്രക്കാര്‍ നല്‍കണമെന്ന നിബന്ധന ജൂലായ് 20 മുതല്‍ ബഹ്‌റൈന്‍ നടപ്പിലാക്കി. ബി അവൈര്‍ ബഹ്‌റൈന്‍ എന്ന ആപ്ലിക്കേഷന്‍ യാത്രക്കാര്‍ മൊബൈലില്‍ ഡൗണ്‍ലോഡ് ചെയ്ത് പ്രവര്‍ത്തന സജ്ജമാക്കണം. പരിശോധനാ ഫലം നെഗറ്റീവ് ആണെന്ന വിവരം ലഭിക്കുന്നതു വരെ സ്വയം നിരീക്ഷണത്തില്‍ കഴിയുമെന്ന നിര്‍ബന്ധിത സത്യവാങ്മൂലം ബഹ്‌റൈനില്‍ എത്തുന്ന എല്ലാ യാത്രക്കാരും ഒപ്പ് വയ്ക്കണം.
60 % പരിശോധനകള്‍ പൂര്‍ത്തിയായി
ബഹ്‌റൈനില്‍ 60 ശതമാനത്തോളം പരിശോധനകള്‍ ഇതുവരെ പൂര്‍ത്തിയായതായി ആരോഗ്യ മന്ത്രി ഫായിഖ ബിന്‍ത് സഈദ് അറിയിച്ചു. കൊവിഡ് പരിശോധന നടത്തി അടുത്ത ദിവസം തന്നെ മൊബൈല്‍ ആപ്ലിക്കേഷനില്‍ നിന്ന് കൊവിഡ് പരിശോധനാ ഫലം അറിയും. പോസിറ്റീവ് ആകുന്നതുവരെ ആരോഗ്യ മന്ത്രാലയം നേരിട്ട് ബന്ധപ്പെടും. ഈ തീരുമാനം നിരന്തരം അവലോകനം ചെയ്യുമെന്നും ആവശ്യമെങ്കില്‍ മാത്രം ഭേദഗതി ചെയ്യുമെന്നും അധികൃതര്‍ അറിയിച്ചു.