കുവൈത്തിലെ അനധികൃത ഗുരുദ്വാര നീക്കണമെന്ന് അധികൃതർ

കുവൈത്ത് സിറ്റി: സുലൈബിക്കാത്തിലെ കെട്ടിടത്തിൽ പ്രവർത്തിക്കുന്ന അനധികൃത സിഖ് ഗുരുദ്വാര നീക്കം ചെയ്യണമെന്ന് പാർലമെന്റ് അംഗങ്ങൾ. വെയർ ഹൌസിന് നൽകിയ സ്ഥലത്താണ് ഗുരുദ്വാര പ്രവർത്തിക്കുന്നതെന്ന് മുനിസിപ്പാലിറ്റി പറയുന്നു. കൃഷി-മത്സ്യ അതോറിറ്റിയുടെ മേൽന്നോട്ടത്തിലുള്ള സ്ഥലമാണിത്. കെട്ടിട ഉടമയ്ക്ക് ആഭ്യന്തര മന്ത്രാലയം നോട്ടീസ് നൽകി.

നിയമവിധേയമല്ലാത്ത ആരാധനാലയം എത്രയും വേഗം നീക്കം ചെയ്യണമെന്ന് മുഹമ്മദ് അൽ ഹായിഫ് എംപി പറഞ്ഞു. മതസ്വാതന്ത്ര്യമെന്നാൽ നിലവിലുള്ള നിയമങ്ങളെ മറികടന്ന് ആരാധനാലയം സ്ഥാപിക്കുക എന്നല്ലെന്ന് റിയാദ് അൽ അദ്സാനി പറഞ്ഞു.

കുവൈത്തിൽ സിഖ് ഗുരുദ്വാര പ്രവർത്തിക്കുന്നതായി അറിവില്ലെന്ന് ഇന്ത്യൻ എംബസി വ്യക്തമാക്കി. ആരാധനാലയം സ്ഥാപിക്കുന്നതിനുള്ള അനുമതിക്കായി ആരും സമീപിച്ചിട്ടില്ലെന്നും എംബസി അധികൃതർ കൂട്ടിച്ചേർത്തു.

ഇന്ത്യയിൽനിന്നുള്ള ഹിന്ദു, ക്രിസ്ത്യൻ, മുസ്ലിം, ബുദ്ധ മതങ്ങളിൽപ്പെട്ടവർ കുവൈത്തിലുണ്ട്. ഇന്ത്യുയും കുവൈത്തും തമ്മിലുള്ള ശക്തമായ ബന്ധത്തിന് ഉലച്ചിലുണ്ടാക്കുന്ന ഒരുതരം നീക്കങ്ങളെയും പിന്തുണയ്ക്കില്ലെന്നും ഇന്ത്യൻ എംബസി അധികൃതർ കൂട്ടിച്ചേർത്തു.

മുസ്ലിം ആരാധനാലയങ്ങൾക്കു പുറമേ അനുമതിയോടുകൂടി ചില ക്രിസ്ത്യൻ ആരാധനാലയങ്ങൾ മാത്രമാണ് പ്രവർത്തിക്കുന്നത്. എന്നാൽ മറ്റ് മതസ്ഥർ നിയമവിധേയമല്ലാതെ ചില കെട്ടിടങ്ങളിൽ ആരാധന സംഘടിപ്പിക്കാറുണ്ട്, ഇവയിലൊന്നിനെതിരെയാണ് നടപടി.