മലയാളി ഇൻഫോസിസ് ഉദ്യോഗസ്ഥൻ അമേരിക്കയിൽ മുങ്ങി മരിച്ചു

വാഷിങ്ങ്‍‍ടണ്‍: മലയാളിയായ ഇൻഫോസിസ് ഉദ്യോഗസ്ഥൻ അമെരിക്കൻ വ്യോമസേനയുടെ ബ്ലൂ എയ്ഞ്ചൽ ഷോക്കിടെ മരിച്ചു. ഷോ കാണാൻ വാഷിങ്ങ്‍‍ടണിൽ എത്തിയ കായംകുളം സ്വദേശി മാണിക്കലാൽ സുബ്രഹ്മണ്യമാണ് തടാകത്തിൽ മകനൊപ്പം നീന്തുന്നതിനിടെ മരിച്ചത്. ഏഴ് വയസുള്ള മകനാണ് ഒപ്പമുണ്ടായിരുന്നത്. ഹൃദയാഘാതമാണ് മരണകാരണമെന്നാണ് പ്രാഥമിക നിഗമനം.

വിനോദസഞ്ചാരികൾക്കായി അമേരിക്കൻ വ്യോമന സേന ഒരുക്കിയ ബ്ലൂ ഏയ്ഞ്ചൽസ് ഷോ കാണാനാണ് സുബ്രഹ്മണ്യം കുടുംബവുമൊന്നിച്ച് സിയറ്റിലിലെ ലേക്ക് വാഷിങ്ടണില്‍ എത്തിയത്. സുബ്രഹ്മണ്യൂത്തിന്റെ ഭാര്യ എട്ടു മാസം ഗർഭിണിയാണ്. നീന്തലിനിടെ സുബ്രഹ്മണ്യത്തെ കാണാതായതോടെ പരിഭ്രാന്തനായ മകൻ നിലവിളിച്ചു. ഓടിയെത്തിയവർ സുബ്രഹ്മണ്യത്തെ തടാകത്തിൽ നിന്ന് പുറത്തെത്തിച്ചു. അബോധാവസ്ഥയിലായ സുബ്രഹ്മണ്യം പത്ത് മിനിറ്റോളം വെള്ളത്തിൽ മുങ്ങിക്കിടന്നെന്നാണ് റിപ്പോർട്ട്.

സുബ്രഹ്മണ്യത്തെ തടാകത്തിൽ നിന്ന് പുറത്തെത്തിച്ചയുടനെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സുബ്രഹ്മണ്യത്തിന്റെ സ്വദേശമായ കായംകുളത്ത് അമേരിക്കയിലെ നടപടികൾ പൂർത്തിയാക്കിയ ശേഷം മൃതദേഹം എത്തിക്കും. ആശയാണ് സുബ്രഹ്മണ്യത്തിന്റെ ഭാര്യ.