ചൈനയിലേക്കുള്ള യാത്രയ്ക്കിടെ മലയാളി വിമാനത്തിൽവെച്ച് മരിച്ചു

ക്വാലലംപൂർ: കൊച്ചിയിൽനിന്നും മലേഷ്യ വഴി ചൈനയിലേക്കുള്ള യാത്രയ്ക്കിടെ മലയാളി വിമാനത്തിൽവെച്ച് മരിച്ചു. മലപ്പുറം മേലാറ്റൂർ സ്വദേശി ഷാജഹാൻ (35) ആണ് മരിച്ചത്. വ്യാഴാഴ്ച പുലർച്ചെ മൂന്നു മണിക്ക് കൊച്ചിയിൽനിന്നും മലേഷ്യൻ എയർലൈൻസ് വിമാനത്തിൽ ചൈനയിലേക്ക് യാത്രചെയ്യവെയായിരുന്നു യുവാവിന്റെ അന്ത്യം.

യാത്രതിരിച്ച് മൂന്നു മണിക്കൂറിനുശേഷം ഷാജഹാന് ദേഹാസ്വാസ്ഥ്യം ആനുഭവപ്പെട്ടുവെന്ന് കൂടെയുണ്ടായിരുന്ന സുഹൃത്ത് ഷിഹാബ് പറഞ്ഞു. അതേ വിമാനത്തിൽ യാത്രചെയ്യുകയായിരുന്ന ഡോക്ടറുടെ സഹായം തേടിയെങ്കിലും മലേഷ്യയിൽ വിമാനം ഇറങ്ങുന്നതിനു മുമ്പുതന്നെ ഷാജഹാന്റെ മരണം സ്ഥിതീകരിച്ചു.

തുടർന്ന് പ്രവാസി സംഘടനാ പ്രവർത്തകർ ഷാജഹാന്റെ മൃതദേഹം ആശുപത്രിയിലെത്തിച്ച് തുടർനടപടികൾ സ്വീകരിച്ചു. വെള്ളിയാഴ്ച ഇന്ത്യൻ ഹൈക്കമ്മീഷന്റെ രേഖകൾ ലഭിച്ചാലുടൻ മൃതദേഹം നാട്ടിലെത്തിക്കാനുള്ള നടപടികൾ സ്വീകരിക്കും. മരിച്ച ഷാജഹാൻ വിവാഹിതനും നാലാം ക്ലാസിൽ പഠിക്കുന്ന കുട്ടിയുമുണ്ട്.