റിയാദിൽ കാണാതായ മലയാളി ടാക്സി ഡ്രൈവർ മരിച്ച നിലയിൽ

റിയാദ്: കഴിഞ്ഞ ദിവസം റിയാദിൽ കാണാതായ മലയാളി ടാക്സി ഡ്രൈവറുടെ മൃതദേഹം കണ്ടെത്തി. മലപ്പുറം ഉമ്മത്തൂർ സ്കൂൾ പറമ്പ് സ്വദേശി കിളിയ മണ്ണിൽ മുസ്തഫ (55)യുടെ മൃതദേഹം റിയാദ് ഷുമൈസി ആശുപത്രിയിലെ മോർച്ചറിയിൽനിന്നാണ് കണ്ടെത്തിയത്.

ഞായറാഴ്ച മുതൽ മുസ്തഫയെ കാൺമാനില്ലായിരുന്നു. ട്രാഫിക് ലംഘനത്തിനോമറ്റോ മുസ്തഫ പിടിലായതാകാമെന്നായിരുന്നു ബന്ധുക്കളുടേയും സുഹൃത്തുക്കളുടേയും നിഗമനം. രാത്രികാലങ്ങളിലായിരുന്നു മുസ്തഫ ഡ്യൂട്ടിക്ക് പോയിരുന്നത്. 30 വർഷമായി അദ്ദേഹം റിയാദിലായിരുന്നു ജോലി ചെയ്തിരുന്നത്.

ചൊവ്വാഴ്ചയും യാതൊരു വിവരവും ലഭിക്കാത്തതിനെത്തുടർന്ന് പിതൃസഹോദര പുത്രനും സുഹൃത്തും ചേർന്ന് നടത്തിയ തെരച്ചിലിനൊടുവിലാണ് മുസ്തഫയുടെ മൃതദേഹം കണ്ടെത്തിയത്. പതിവുപോലെ ജോഗിങ്ങിനായി മലാസിലെ കിങ് അബ്ദുള്ള പാർക്കിൽ പോകാറുള്ള മുസ്തഫ വ്യായാമത്തിനിടെ കുഴഞ്ഞുവീണ് മരിക്കുകയായിരുന്നു.

ഒന്നര വർഷം മുമ്പാണ് അദ്ദേഹം നാട്ടിൽ പോയി വന്നത്. റിയാദിലുള്ള സഹോദരങ്ങളായ ബഷീർ, സലിം, സക്കീർ എന്നിവരുടെ നേതൃത്വത്തിൽ മുസ്തഫയുടെ മൃതദേഹം റിയാദിൽ മറവുചെയ്യാനാണ് തീരുമാനം. ഭാര്യ: മുംതാസ്, മക്കൾ: അർഷാദ്, അർഷിദ, നിദ.