സൗദിയിൽ മലയാളി നഴ്സിനെ മരിച്ച നിലയിൽ കണ്ടെത്തി

റിയാദ്: മലയാളി നഴ്സിനെ സൗദി അറേബ്യയിൽ മരിച്ച നിലയിൽ കണ്ടെത്തി. റിയാദിലെ സ്വകാര്യ ആശുപത്രിയിൽ സ്റ്റാഫ് നഴ്സായ ഇടുക്കി കുമളി സ്വദേശിനി ചക്കുഴിയിൽ സൗമ്യയെയാണ് (33) താമസസ്ഥലത്ത് മരിച്ച നിലയിൽ കണ്ടെത്തിയതെന്ന് മാധ്യമമാണ് റിപ്പോർട്ട് ചെയ്തത്.

റിയാദ് അല്‍ജസീറ ഹോസ്പിറ്റലിൽ സ്റ്റാഫ് നഴ്‌സാണ് മരിച്ച സൗമ്യയെന്ന് യൂണൈറ്റഡ് നഴ്സസ് അസോസിയേഷൻ ഫേസ്ബുക്ക് പോസ്റ്റിലൂടെയും വ്യക്തമാക്കി. ഒരു വര്‍ഷമായി അൽജസീറ ഹോസ്പിറ്റലിലെ ജീവനക്കാരിയാണ് ഇവരെന്നാണ് റിപ്പോർട്ടുകൾ.

റിയാദ് ശുമൈസി ആശുപത്രി മോർച്ചറിയിലുള്ള മൃതദേഹം നാട്ടിലെത്തിക്കുന്നതിന് ശ്രമം ആരംഭിച്ചിട്ടുണ്ട്. ഭർത്താവ് നോബിളും ഏക മകൻ ക്രിസ് നോബിൾ ജോസും നാട്ടിലാണ്.

Also Read : ആഴ്‍ച്ച 10,000 ടിക്കറ്റുകള്‍; സര്‍വീസിന് നാല് വിമാനക്കമ്പനികള്‍; ഇന്ത്യ - ഒമാന്‍ യാത്ര ഇന്ന് മുതല്‍

സൗദി അറേബ്യയില്‍ പ്രതിദിന കൊവിഡ് കേസുകളിൽ കുറവുണ്ടെങ്കിലും ഇരുപതിലധികം മരണങ്ങളാണ് ദിവസവും റിപ്പോർട്ട് ചെയ്യപ്പെടുന്നത്. ബുധനാഴ്ച 24 മരണങ്ങളായിരുന്നു ആരോഗ്യ വകുപ്പ് സ്ഥിരീകരിച്ചത്. ഇതോടെ ആകെ മരണസംഖ്യ 4947 ആയി ഉയര്‍ന്നു. പുതുതായി 468 പോസിറ്റീവ് കേസുകളും രജിസ്റ്റര്‍ ചെയ്തു. 596 പേർക്ക് രോഗമുക്തിയും ലഭിച്ചിട്ടുണ്ട്.

Also Read : ഐടി ജോലികള്‍ സ്വദേശികള്‍ക്ക് മാത്രം, സൗദിയുടെ ശ്രമം 9000 തൊഴിലവസരങ്ങള്‍, പ്രവാസികള്‍ക്ക് തിരിച്ചടി

ഇതുവരെ 337,711 കൊവിഡ് കേസുകളാണ് സൗദിയിൽ റിപ്പോർട്ട് ചെയ്തിരിക്കുന്നത്. ഇതിൽ 323208 പേര്‍ രോഗമുക്തി നേടി. 9556 ആക്ടീവ് കേസുകളാണ് ഇവിടെയുള്ളത്. അതില്‍ 913 പേരുടെ നില ഗുരുതരമാണെന്നും ആരോഗ്യ വകുപ്പ് അറിയിച്ചു.