പ്രളയ ദുരിതാശ്വാസം; വിവാഹ സത്കാരം ഒഴിവാക്കി പ്രവാസി

കുവൈത്ത് സിറ്റി: കേരളത്തിൽ പ്രളയത്തിൽ ദുരിതം അനുഭവിക്കുന്നവരെ സഹായിക്കാൻ പ്രവാസി മലയാളി വിവാഹ സത്കാരം ഒഴിവാക്കി. സത്കാരത്തിനുവേണ്ടി കരുതിവെച്ച തുക ദുരിതാശ്വാസ പ്രവർത്തനത്തിനുവേണ്ടി വിനിയോഗിക്കുമെന്ന് വരൻ സന്തോഷ് കുമാർ പറഞ്ഞു.

മലപ്പുറം ചുങ്കത്തറ പള്ളിക്കുത്ത് അമ്പാടിയിൽ രാമചന്ദ്രൻ നായരുടേയും ശാന്തമ്മയുടേയും മകനായ സന്തോഷ് കുമാറും ഗൂഡല്ലൂർ തുറപള്ളി പുത്തൻവീട്ടിൽ ദേവേന്ദ്രന്റെയും സത്യഭാമയുടേയും മകൾ അമോദിനിയും തമ്മലുള്ള വിവാഹം ആഗസ്റ്റ് 17നായിരുന്നു നിശ്ചയിച്ചിരുന്നത്.

വിവാഹ സത്കാരം പൂർണ്ണമായും ഒഴിവാക്കി അതിനായി കരുതിവെച്ചിരുന്ന തുക പൂർണ്ണമായും ദുരിതാശ്വാസത്തിനു വിനിയോഗിക്കും. ഇക്കാര്യം വ്യക്തമാക്കിക്കൊണ്ടും ക്ഷണിക്കപ്പെട്ടവരോട് ക്ഷമ പറഞ്ഞും സന്തോഷ് ഫേസ്ബുക്കിൽ പോസ്റ്റ് ചെയ്ത കുറിപ്പിനെ അഭിനന്ദിച്ച് നിരവധിപ്പേരാണ് രംഗത്തെത്തിയിരിക്കുന്നത്.