കുവൈത്ത് ആരോഗ്യ മന്ത്രാലയത്തിൽ വിദേശികളെ നിയമിക്കുന്നതിന് നിയന്ത്രിത അനുമതി

കുവൈത്ത് സിറ്റി: കുവൈത്ത് ആരോഗ്യമന്ത്രാലയത്തിലെ ഒഴിഞ്ഞുകിടക്കുന്ന തസ്തികയിലേക്ക് വിദേശികളെ നിയമിക്കുന്നതിനുള്ള നിരോധനം നീക്കി. സിവിൽ സർവ്വീസ് കമ്മീഷനാണ് ഇതുസംബന്ധിച്ചുള്ള അറിയിപ്പ് പുറപ്പെടുവിച്ചത്. നേരത്തെ സ്വദേശിവത്കരണത്തിന്റെ ഭാഗമായി വിദേശികളെ നിയമിക്കുന്നതിൽ വിലക്കുണ്ടായിരുന്നു.

ആരോഗ്യ മന്ത്രാലയത്തിലേക്ക് വേണ്ടത്ര യോഗ്യതയുള്ള ആളുകലെ ലഭിക്കാത്ത സാഹചര്യത്തിലാണ് നിരോധനം പിൻവലിച്ചത്. 45 ഡോക്ടർമാർ, 13 ടെക്നീഷ്യന്മാർ, 133 നഴ്സുമാർ എന്നിവയടക്കം 193 ഒഴിവുകളാണ് നിലവിലുള്ളത്. ഇതിലേക്ക് വിദേശികളെ നിയമിക്കാനാണ് സിവിൽ സർവ്വീസ് കമ്മീഷൻ നിർദ്ദേശം നൽകിയിരിക്കുന്നത്.

വിദ്യാഭ്യാസ മന്ത്രാലയം, ആരോഗ്യ മന്ത്രാലയം തുടങ്ങിയ വകുപ്പുകളിലേക്ക് നിയമനം നടത്തുന്നതിന് വിദേശികൾക്കേർപ്പെടുത്തിയിരിക്കുന്ന നിയമന വിലക്കിൽ ഇളവുവരുത്തണമെന്ന് വിവിധ മന്ത്രാലയങ്ങൾ സിവിൽ സർവ്വീസ് കമ്മീഷന് അപേക്ഷ നൽകിയിരുന്നു. യോഗ്യതയുള്ള സ്വദേശികളെ കണ്ടെത്താൻ സാധിക്കാത്തതുമൂലം ദൈനംദിന പ്രവർത്തനങ്ങളിൽ തടസ്സം നേരിടുന്നുണ്ടെന്നാണ് വിവിധ വകുപ്പുകളുടെ വാദം.

ഘട്ടംഘട്ടമായി സ്വദേശികളെ പരിശീലിപ്പിച്ചെടുക്കുമെന്നാണ് സിവിൽ സർവ്വീസ് മന്ത്രാലയത്തിന്റെ വാദം. അഞ്ച് വർഷത്തിനുള്ളിൽ സർക്കാർ മേഖലയിൽ പൂർണ്ണമായും സ്വദേശി വത്കരണം നടപ്പാക്കാനാണ് സർക്കാർ ഉദ്ദേശിക്കുന്നത്.