ലോക കേരള സഭ നാമനിര്‍ദേശം നവംബര്‍ 10 വരെ

കൊച്ചി: ലോകമെമ്പാടുമുളള മലയാളികള്‍ക്ക് പൊതുചര്‍ച്ചാവേദി എന്ന നിലയില്‍ സംസ്ഥാന സര്‍ക്കാര്‍ ആവിഷ്‌കരിച്ച ലോക കേരള സഭയിലേയ്ക്ക് പ്രവാസി പ്രതിനിധികളെ നാമനിര്‍ദേശം ചെയ്യുന്നതിന് നവംബര്‍ 10 വരെ അപേക്ഷ നല്‍കാം. സഭാംഗത്വത്തിനായി വ്യക്തികള്‍ സ്വയമോ സംഘടനകള്‍ മുഖേനയോ നാമനിര്‍ദേശം ചെയ്യാവുന്നതാണ്.

രണ്ടു വര്‍ഷത്തിലൊരിക്കല്‍ കൂടുന്ന സഭയില്‍ ഒരംഗത്തിന്റെ കാലാവധി അഞ്ചു വര്‍ഷമായിരിക്കും. 2018 ജനുവരിയില്‍ 12, 13 തീയതികളില്‍ ആദ്യ ലോക കേരള സഭ തിരുവനന്തപുരത്ത് സംഘടിപ്പിക്കും.

പ്രവാസികളും കേരളവും തമ്മിലുള്ള കൂട്ടായ്മയും സഹകരണവും പ്രോത്സാഹിപ്പിക്കുകയും കേരളീയ സംസ്‌കാരത്തിന്റെ വികസനത്തിനു പ്രവര്‍ത്തിക്കുകയുമാണ് ലോക കേരള സഭയുടെ ലക്ഷ്യം.


പ്രതിനിധികളെ നാമനിര്‍ദേശം ചെയ്യുന്നതിനുള്ള അപേക്ഷ www.lokakeralasabha.com വെബ്‌സൈറ്റില്‍ ഓണ്‍ലൈന്‍ വഴി സമര്‍പ്പിക്കാം. നാമനിര്‍ദേശം ലഭിക്കേണ്ട അവസാന തീയതി നവംബര്‍ 10 ഇന്ത്യന്‍ സമയം രാത്രി 12 മണി ആണ്.