നാട്ടിൽ പോകാൻ വിമാനത്താവളത്തിലെത്തിയ മലയാളി കുഴഞ്ഞുവീണ് മരിച്ചു

ദമാം: നാട്ടിൽ പോകാനായി ദമാം വിമാനത്താവളത്തിലെത്തിയ മലയാളി കുഴഞ്ഞുവീണ് മരിച്ചു. കോഴിക്കോട് പൊന്നിയം സ്വദേശി മീത്തല ചെങ്ങലത്തിൽ കോളോത്ത് ഖാലിദ് (70) ആണ് ഹൃദയാഘാതം മൂലം കുഴഞ്ഞുവീണ് മരിച്ചത്.

വെള്ളിയാഴ്ച പുലർച്ചെ നാട്ടിലേക്ക് പോകാനായി ദമാം വിമാനത്താവളത്തിൽ എമിഗ്രേഷൻ പൂർത്തിയാക്കിയ ശേഷം ഇരിക്കുന്ന സീറ്റിൽ കുഴഞ്ഞുവീണായിരുന്നു ഖാലിദിന്റെ മരണം.

സന്ദർശക വിസയിൽ ദമാമിലെത്തിയതായിരുന്നു ഖാലിദ്. കഴിഞ്ഞ ദിവസം ശാരീരിക ആസ്വാസ്ഥ്യമുണ്ടായതിനെത്തുടർന്ന് നാട്ടിലേക്ക് തിരിക്കവെയായിരുന്നു മരണം. നേരത്തെ ഖാലിദ് സൗദിയിൽ ജോലിചെയ്തിട്ടുണ്ട്.