അറബ് റിയാലിറ്റി ഷോയിൽ അഭിമാന താരമായി മീനാക്ഷി

ദുബൈ: ഷാർജ ടിവിയുടെ ജനകീയമായ സംഗീത റിയാലിറ്റി ഷോയില്‍ അറബ് മൽസരാർഥികളെ പിന്തള്ളി മലയാളി വിദ്യാര്‍ഥിനിക്ക് കിരീടം. അങ്കമാലി സ്വദേശിയായ ഏഴാം ക്ലാസുകാരി മീനാക്ഷിയാണ് ഷാര്‍ജ ഭരണാധികാരിയില്‍ നിന്ന് സമ്മാനം നേടിയത്.

മുന്‍ഷിദ് എന്ന പേരില്‍ ഷാർജ ടിവി ഒരുക്കിയ സംഗീത റിയാലിറ്റിഷോയുടെ ഗ്രാൻഡ് ഫിനാലേയിൽ അറബ് ഉച്ചാരണശുദ്ധികൊണ്ടും ആലാപനമികവ് കൊണ്ടും ഈ മിടുക്കി അറബികളെ പോലും അമ്പരപ്പിച്ചു. ഫൈനലിലേക്ക് യോഗ്യത നേടിയ എട്ട് പേരിൽ അറബിയല്ലാത്ത ഏക മൽസരാർ‍ത്ഥിയും മലയാളിയായ മീനാക്ഷിയായിരുന്നു.

ഷാര്‍ജ ഭരണാധികാരി ഡോ. ശൈഖ് സുല്‍ത്താന്‍ ബിന്‍ മുഹമ്മദ് ആല്‍ഖാസിമി തന്നെ മീനാക്ഷിക്ക് കിരീടം സമ്മാനിക്കാനെത്തി. സമ്മാനത്തുക ഇനിയും വെളിപ്പെടുത്തിയിട്ടില്ല. ഷാര്‍ജയില്‍ എഞ്ചിനീയറായ ജയകുമാറിന്റെയും ഡോ. രേഖയുടെയും മകളാണ് മീനാക്ഷി. ഷാര്‍ജ ജെംസ് മില്ലേനിയം സ്കൂളിലെ ഏഴാംക്ലാസ് വിദ്യാര്‍ഥിനിയാണ്. പ്രേക്ഷകരില്‍ നിന്നുള്ള വോട്ട് കൂടി പരിഗണിച്ചാണ് വിജയിയെ നിശ്ചയിച്ചത്.