ഇന്ത്യയിൽ മാത്രമല്ല, അങ്ങ് സൗദിയിലുമുണ്ട് 'ന്യൂഡൽഹി'

ജിദ്ദ: സൗദിയിലൊരു ന്യൂഡൽഹി തെരുവുണ്ട്. ഇന്ത്യ-സൗദി സൗഹൃദം വിളമ്പരം ചെയ്തുനിൽക്കുന്ന ആ തെരുവിന് പ്രവാസികളുടെ തൊഴിൽ തേടിയുള്ള കുടിയേറ്റത്തോളം പഴക്കമുണ്ട്. ഡൽഹിയിലെ പച്ചപ്പുപോലെ ആര്യവേപ്പുകളാൽ സമൃദ്ധമാണിവിടം.

ബഗ്ദ്ദാദിയയിലെ മദീന റോഡിനടുത്ത് തലാൽ ഇന്റർനാഷ്ണൽ സ്കൂളിനടുത്തുള്ള ഈ തെരുവിലായിരുന്നു 35 വർഷം മുമ്പ് ഇന്ത്യൻ എംബസി സ്ഥിതിചെയ്തിരുന്നത്. എന്നാൽ അന്ന് ഇന്ത്യക്കാർ ജിദ്ദയിൽ ഇന്നത്തേതുപോലെ ഉണ്ടായിരുന്നില്ല. മാത്രവുമല്ല എംബസിയുമായി ബന്ധപ്പെടുന്നവർ കുറവുമായിരുന്നു.

ഇന്ത്യയുടേത് മാത്രമല്ല, മറ്റ് രാജ്യങ്ങളുടെ എംബസികളും പ്രവർത്തിച്ചിരുന്നത് ജിദ്ദയിൽത്തന്നെയായിരുന്നു. തുടർന്ന് മുഴുവൻ എംബസികളോടും തലസ്ഥാനമായ റിയാദിലേക്ക് മാറാൻ നിർദ്ദേശം നൽകിയതിന്റെ അടിസ്ഥാനത്തിലാണ് ജിദ്ദയിലെ എംബസി കെട്ടിടങ്ങൾ കോൺസുലേറ്റുകളായി മാറിയത്. അന്ന് എംബസി കെട്ടിടത്തിന്റെ സമീപത്തുതന്നെയായിരുന്നു സ്കൂളിന്റെ പ്രവർത്തനം, മാധ്യമം റിപ്പോർട്ട് ചെയ്തു.

എംബസിയിലെ പരിപാടികളെല്ലാം നടന്നിരുന്നത് ഇവിടെവെച്ചായിരുന്നു. പിൽക്കാലത്ത് കോൺസുലേറ്റ് മദീന റോഡിലേക്കും പിന്നീട് തെഹ്ലിയാ സ്ട്രീറ്റിലേക്കും മാറി. എംബസി സ്കൂൾ അസീസിയയിലേക്കും മാറി. ആദ്യ എംബസി കെട്ടിടം പ്രവർത്തിച്ചിരുന്ന സ്ഥലത്തിന്റെ പേര് ഇന്ത്യൻ തലസ്ഥാനത്തിന്റെ പേരിൽ അറിയപ്പെടുകയും ചെയ്തു.