തൊഴിലിടത്തിലെ ചൂഷണത്തിനു വിലങ്ങുമായി സൗദിയിൽ പുതിയ നിയമം

റിയാദ്: തൊഴിലാളികളുടെ സുരക്ഷയ്ക്കായി സൗദിയിൽ പുതിയ നിയമം. തൊഴിലിടങ്ങളിലെ സുരക്ഷ ഉറപ്പുവരുത്തുന്നതിനായി തൊഴിൽ മന്ത്രാലയമാണ് നിയമം തയ്യാറാക്കിയിരിക്കുന്നത്. ഓഗസ്റ്റ് 31 മുതൽ ഇത് പ്രാബല്യത്തിൽ വരും. വ്യക്തികളുടെ സ്വകാര്യതയും സ്വാതന്ത്ര്യവും സംരക്ഷിക്കുകയാണ് പ്രധാന ലക്ഷ്യം.

തൊഴിൽ സ്ഥലത്തെ പീഡനം, മോശം പെരുമാറ്റം എന്നിവയിൽനിന്നും സംരക്ഷണം നൽകാൻ ലക്ഷ്യമിടുന്ന പുതിയ നിയമാവലി സാമൂഹ്യ വികസന മന്ത്രാലയം അംഗീകരിച്ചു. ചൂഷണം, ഭീഷണി, ലൈംഗിക പീഡനം, ബ്ലാക്ക്മെയിലിങ് എന്നിവയിൽനിന്നും സംരക്ഷണം, എതിർലിംഗത്തിൽപ്പെട്ടയാൾക്കൊപ്പം ഒറ്റയ്ക്ക് ജോലിചെയ്യാൻ സാഹചര്യം സൃഷ്ടിക്കുക, എന്നീ കാര്യങ്ങളാണ് പുതിയ നിയമം ഉറപ്പുനൽകുന്നത്.

തൊഴിലാളികളോടുള്ള തൊഴിലുടമയുടെ പെരുമാറ്റം, തൊഴിലുടമയോട് തൊഴിലാളിയുടെ പെരുമാറ്റം തൊഴിലാളികൾ തമ്മിലുള്ള പെരുമാറ്റം എന്നിവയും നിയമത്തിന്റെ പരിധിയിൽപ്പെടും. നിയമലംഘനങ്ങളെക്കുറിച്ച് ഇ മെയിൽ വഴിയും ശബ്ദസന്ദേശമായും പരാതിപ്പെടാനുള്ള സൗകര്യം ഒരുക്കും.

സ്ഥാപന ഉടമയിൽനിന്നും പീഡനം നേരിടേണ്ടിവന്നാൽ ബന്ധപ്പെട്ട സർക്കാർ വകുപ്പിനാണ് തൊഴിലാളികൾ പരാതി നൽകേണ്ടത്.