യുഎഇയിൽ പുതിയ വിസ നിയമം പ്രാബല്യത്തിൽ

ദുബായ്: യുഎഇയിൽ പുതിയ വിസ നിയമം ഇന്നു മുതൽ പ്രാബല്യത്തിൽ. സന്ദ‍ർശനത്തിന് വന്നതിന് ശേഷം വിസ കാലാവധി കഴിയുന്നവർക്കും വിധവകൾക്കുമാണ് പുതിയ നിയമം കൂടുതൽ ഗുണകരമാകുന്നത്. സന്ദർശനത്തിനായി വന്നവർക്ക് വിസ കാലാവധിക്കുശേഷം രാജ്യം വിടാതെ തന്നെ ഇനിമുതൽ പുതിയ വിസ എടുക്കാമെന്നതാണ് പ്രത്യേകത.

വിധവകളുടെയും വിവാഹമോചനം നേടിയ സ്ത്രീകളുടെയും അവരുടെ കുട്ടികളുടെയും റെസി‍‍ഡന്റ് വിസയുടെ കാലാവധി ഒരു വർഷത്തേക്ക് നീട്ടി നൽകുമെന്ന് ഫെഡറൽ അതോറിറ്റി ഫോർ ഐഡന്റിറ്റി ആൻഡ് സിറ്റിസൻഷിപ്പ് അറിയിച്ചു. കൂടാതെ മാതാപിതാക്കളുടെ സ്പോൺസർഷിപ്പിൽ പഠിക്കുന്ന വിദ്യാർഥികളുടെയും വിസ കാലാവധി നീട്ടി നൽകും.

പുതിയ വിസ നിയമം യുഎഇയുടെ സമ്പദ്ഘടനയ്ക്ക് അഭിവൃദ്ധിയുണ്ടാകുമെന്ന് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു.