കുവൈത്തിൽ വിദേശി കുടുംബങ്ങൾക്ക് ഗാർഹിക ജോലിക്കാരെ നൽകില്ല

കുവൈത്ത് സിറ്റി: കുവൈത്ത് സ്വദേശികൾക്ക് ആവശ്യമായ ഗാർഹിക തൊഴിലാളികളെ ലഭിക്കാതെ വിദേശികളുടെ അപേക്ഷ സ്വീകരിക്കാനാകില്ലെന്ന് അൽ ദുരാ കമ്പനി ചെയർമാൻ ഫഹദ് അൽ ഷത്തി. ഗാർഹിക തൊഴിലാളികളെ റിക്രൂട്ട് ചെയ്യുന്നതുമായി ബന്ധപ്പെട്ടുണ്ടായ പരാതികളെ തുടർന്നാണ് നടപടിയെന്നും അദ്ദേഹം വ്യക്തമാക്കി.

നിലവിൽ കുവൈത്തിലേക്കുള്ള ഗാർഹിക തൊഴിലാളികളുടെ റിക്രൂട്ട്മെന്റ് നടക്കുന്നത് അൽ ദുര കമ്പനിക്കു കീഴിലാണ്. കമ്പനിയുടെ ചെർമാൻ സ്ഥാനം ഏറ്റെടുത്തതിനു പിന്നാലെയാണ് വിദേശികൾക്ക് ഗാർഹിക തൊഴിലാളികളെ നൽകാൻ കഴിയില്ലെന്ന് ഫഹദ് അൽ ഷത്തി വ്യക്തമാക്കിയിരിക്കുന്നത്.

നിലവിൽ സ്വദേശികൾ അഭിമുഖീകരിക്കുന്ന പ്രധാന പ്രശ്നം ഗാർഹിക തൊഴിലാളികളെ ലഭിക്കുന്നില്ല എന്നുള്ളതാണ്. സ്വദേശികൾക്കുള്ള ഗാർഹിക തൊഴിലാളികളെ ലഭ്യമാക്കുന്നതിന് വിദേശത്തുനിന്നും തൊഴിലാളികളെ റിക്രൂട്ട് ചെയ്യും. ഈ വർഷം അവസാനത്തോടെ ഗാർഹിക തൊഴിലാളികളുടെ ലഭ്യതക്കുറവ് പരിഹരിക്കുമെന്നും അൽ ഷത്തി പറഞ്ഞു.

വിദേശ രാജ്യങ്ങളിലെ അതാത് എംബസികളുമായി ബന്ധപ്പെട്ട് ആവശ്യമായ ഗാർഹിക തൊളിലാളികളെ രാജ്യത്ത് എത്തിക്കുമെന്നും അദ്ദേഹം കൂട്ടിച്ചേർത്തു.