നിരീക്ഷണം രാജഗിരിയില്‍
പ്രവാസികളുമായി വ്യാഴാഴ്ച എത്തുന്ന ആദ്യ വിമാനത്തില്‍ ഉള്ളവര്‍ക്ക് കളമശ്ശേരി രാജഗിരി കോളേജ് ഹോസ്റ്റലിലാണ് നിരീക്ഷണ സംവിധാനം ഒരുക്കിയിരിക്കുന്നത്. 75 റൂമുകളാണ് ഇത്തരത്തില്‍ രാജഗിരി ഹോസ്റ്റലില്‍ സജ്ജമാക്കിയിട്ടുള്ളത്. ജില്ലയിലുള്ള രോഗലക്ഷണമില്ലാത്ത ആളുകളെ മാത്രമായിരിക്കും ഹോസ്റ്റലുകളില്‍ താമസിപ്പിക്കുക. ആളുകളെ താമസിപ്പിക്കാന്‍ ഹോട്ടല്‍ റൂമുകള്‍ ഉപയോഗിക്കുന്നതിനുള്ള ശ്രമങ്ങള്‍ നടന്നു വരികയാണ്.
രോഗലക്ഷണമുള്ളവര്‍ ആശുപത്രിയിലേക്ക്
രോഗ ലക്ഷണമുള്ളവരെ ആലുവ ജില്ല ആശുപത്രിയിലേക്കും മറ്റ് ജില്ലകളില്‍ നിന്നുള്ളവരെ അതാത് ജില്ലകളില്‍ സജ്ജമാക്കിയിരിക്കുന്ന നിരീക്ഷണ കേന്ദ്രത്തിലേക്കും മാറ്റും. ഇതിനായി എല്ലാ ജില്ലകളിലേക്കുമുള്ള കെ.എസ്.ആര്‍.ടി.സി ബസുകളും നെടുമ്പാശ്ശേരിയില്‍ സജ്ജമാക്കും. അറ്റാച്ച്ഡ് ബാത്ത്‌റും സംവിധാനവും വെള്ളവും വൈദ്യുതിയുമുള്ള സ്ഥലങ്ങളാണ് പ്രവാസികളെ നിരീക്ഷണത്തില്‍ താമസിപ്പിക്കാനായി കണ്ടെത്തിയിട്ടുള്ളത്.
എത്തുക മുന്‍ഗണന പ്രകാരം
വ്യാഴാഴ്ച എത്തുന്ന ആദ്യ വിമാനത്തില്‍ എറണാകുളം ജില്ലയില്‍ നിന്നുള്ള ഇരുപതിലധികം യാത്രക്കാര്‍ ഉണ്ടെന്നാണ് പ്രാഥമിക വിവരം. ഗര്‍ഭിണികള്‍, പ്രായമായവര്‍, ചികിത്സ ആവശ്യമുള്ളവര്‍ തുടങ്ങിയവര്‍ക്കാണ് മുന്‍ഗണന നല്‍കുന്നത്. അടിയന്തര സാഹചര്യങ്ങള്‍ നേരിടാന്‍ വിവിധ വകുപ്പുകളിലെ ഡോക്ടര്‍മാരുടെ സേവനവും ഉറപ്പാക്കും.
ഇതര സംസ്ഥാനങ്ങളിൽ നിന്ന് 399 പേർ
പ്രവാസി മലയാളികള്‍ വിവിധ രാജ്യങ്ങളില്‍ നിന്ന് സംസ്ഥാനത്തേക്ക് എത്തുന്നതിന് മുമ്പ് തന്നെ അയല്‍ സംസ്ഥാനങ്ങളില്‍ കുടുങ്ങിക്കിടന്ന മലയാളികള്‍ കേരളത്തിലേക്ക് എത്തിത്തുടങ്ങിയിട്ടുണ്ട്. കഴിഞ്ഞ മൂന്ന് ദിവസങ്ങളിലായി ആയിരങ്ങളാണ് സംസ്ഥാനത്തേക്ക് എത്തിയിട്ടുള്ളത്. ഇതോടൊപ്പം പ്രവാസികളെയും വഹിച്ചുകൊണ്ടുള്ള ആദ്യവിമാനങ്ങള്‍ എത്തുന്ന എറണാകുളം ജില്ലയിലേക്ക് മറ്റ് സംസ്ഥാനങ്ങളിൽ നിന്ന് ഇതുവരെ 399 പേർ എത്തിയിട്ടുണ്ട്.