മുഖ്യമന്ത്രി ക്ഷണിച്ചു; ഷാര്‍ജ സുല്‍ത്താന്‍ കേരളത്തിലേക്ക്‌

ഷാര്‍ജ: ഷാര്‍ജ ഭരണാധികാരി ശൈഖ് ഡോ. സുല്‍ത്താന്‍ ബിന്‍ മുഹമ്മദ് അല്‍ ഖാസിമി കേരളം സന്ദര്‍ശിക്കും. വ്യാഴാഴ്ച വൈകീട്ട് ശൈഖ് സുല്‍ത്താനെ ഷാര്‍ജ ബിദ പാലസില്‍ സന്ദര്‍ശിച്ച മുഖ്യമന്ത്രി പിണറായി വിജയനാണ് അദ്ദേഹത്തെ കേരളത്തിലേക്ക് ക്ഷണിച്ചത്. സന്ദര്‍ശന സമയം ഔദ്യോഗികമായി പ്രഖ്യാപിച്ചിട്ടില്ല.

അടുത്ത വര്‍ഷം സെപ്തംബറിലായിരിക്കും സന്ദര്‍ശനം നടക്കുക. ക്ഷണം ഷാര്‍ജ സുല്‍ത്താന്‍ സന്തോഷപൂര്‍വം സ്വീകരിച്ചു. ഇരുവരും തമ്മിലുള്ള കൂടിക്കാഴ്ച 45 മിനുട്ട് നീണ്ടുനിന്നു. കാലിക്കട്ട് സര്‍വകലാശാലയുടെ ഓണററി ഡോക്ടറേറ്റ് അദ്ദേഹത്തിന് നേരത്തെ പ്രഖ്യാപിച്ചിരുന്നു. അത് സ്വീകരിക്കുന്നതിനും കേരള സര്‍ക്കാരിന്റെ അതിഥിയുമായാണ് അദ്ദേഹത്തെ ക്ഷണിച്ചത്.

മുഖ്യമന്ത്രിയോടൊപ്പം നോര്‍ക്ക വൈസ് ചെയര്‍മാന്‍ എം.എ.യൂസഫലി, ഷംസുദ്ദീന്‍ ബിന്‍ മുഹിയുദ്ദീന്‍, മുഖ്യമന്ത്രിയുടെ മാധ്യമ ഉപദേഷ്ടാവ് ജോണ്‍ ബ്രിട്ടാസ്, ഷാര്‍ജ ഇന്ത്യന്‍ അസോസിയേഷന്‍ പ്രസിഡണ്ട് അഡ്വ.വൈ.എ.റഹിം, ജനറല്‍ സെക്രട്ടറി ബിജു സോമന്‍ എന്നിവരും ഉണ്ടായിരുന്നു.




English Summary: sharja sultan to visit kerala