ഫോൺ വഴി സാമ്പത്തിക തട്ടിപ്പ്; അബുദാബിയിൽ 25 പേർ പിടിയിൽ

അബുദാബി: ഫോൺവഴി തട്ടിപ്പുനടത്തിയ 25 പേരെ അബുദാബി പോലീസ് അറസ്റ്റ് ചെയ്തു. മൂന്ന് സംഘങ്ങളെയാണ് അറസ്റ്റ് ചെയ്തത്. ഷാർജ, അജ്മാൻ പോലീസിന്റെ സഹകരണത്തോടെയാണ് അറസ്റ്റ്. ഫോണിലൂടെ ബാങ്ക് അക്കൌണ്ട് വിവരം ശേഖരിച്ചശേഷം പണം തട്ടുന്ന സംഘമാണ് അറസ്റ്റിലായതെന്ന് പോലീസ് പറഞ്ഞു. മൂന്ന് വ്യത്യസ്ത സംഘത്തിൽപ്പെട്ട ആളുകളാണ് പിടിയിലായതെന്ന് അബുദാബി ക്രിമിനൽ ഇൻവെസ്റ്റിഗേഷൻ ഡിപ്പാർട്ട്മെന്റ് തലവൻ ബ്രിഗേഡിയർ ജനറൽ ഇമ്രാൻ അഹമ്മദ് അൽ മസൂരി പറഞ്ഞു.

രണ്ട് സംഘങ്ങളിൽപ്പെട്ട 14 പേരെ ഷാർജയിൽനിന്നും 11 പേരടങ്ങിയ മറ്റൊരു സംഘത്തെ അജ്മാനിൽനിന്നുമാണ് അറസ്റ്റ് ചെയ്തതെന്ന് അബുദാബി പോലീസ് പറഞ്ഞു. പ്രതികളിൽനിന്നും തട്ടിപ്പിനായി ഉപയോഗിച്ച ഫോണുകളും സിം കാർഡുകളും അറസ്റ്റിനിടെ പിടിച്ചെടുത്തതായി അൽ മസൂരി പറഞ്ഞു.

അപരിചിതർക്ക് ബാങ്ക് അക്കൌണ്ട് വിവരങ്ങൾ നൽകി വഞ്ചിതരാകാതിരിക്കാൻ ആളുകൾ പ്രത്യേകം ശ്രദ്ധിക്കണമെന്ന് പോലീസ് മുന്നറിയിപ്പ് നൽകി. ഇടപാടുകാരെ ഫോണിൽ വിളിച്ച് ബാങ്കിൽനിന്നും ഒരുതരത്തിലുമുള്ള വിവരം ആരായില്ല. ഇടപാടുകാരുമായി നേരിട്ടാണ് ബാങ്ക് അധികൃതർ ഇടപാട് നടത്തുക. അതിനാൽ ഫോണിലൂടെ തട്ടിപ്പിനിരയാകാതിരിക്കാൻ ശ്രദ്ധിക്കേണ്ടതുണ്ടെന്നും അൽ മസൂരി മുന്നറിയിപ്പു നൽകി.

ഈ വർഷം ഏപ്രിലിൽ സമാനമായ രീതിയിൽ തട്ടിപ്പുനടത്തിയ 24 പേരെ അജ്മാൻ പോലീസ് അറസ്റ്റ് ചെയ്തിരുന്നു. പരിചയമില്ലാത്ത നമ്പറുകളിൽനിന്നും മെസേജോ ഫോൺ കോളുകളോ ലഭിച്ചാൽ ബാങ്ക് അക്കൌണ്ട് വിവരങ്ങൾ കൈമാറാതിരിക്കാൻ ശ്രദ്ധിക്കണമെന്ന് പോലീസ് മുന്നറിയിപ്പ് നൽകി. ഫോൺ കോൾ ലഭിച്ചാൽ മറുതലയ്ക്കലുള്ളത് ആരാണെന്ന് ഉറപ്പുവരുത്തിയ ശേഷമേ അക്കൌണ്ട് വിവരങ്ങൾ നൽകാവൂ എന്നും പോലീസ് പറഞ്ഞു. പരിചയമില്ലാത്ത നമ്പറുകളിൽനിന്നും ബാങ്ക് അക്കൌണ്ട് വിവരം ആരാഞ്ഞ് തുടർച്ചയായി ഫോൺ വിളികൾ ലഭിച്ചാൽ അത്തരം നമ്പറുകൾ ബ്ലോക്ക് ചെയ്യണമെന്നും പോലീസ് പറഞ്ഞു.