135780 സിസിടിവികൾ; റാസൽഖൈമ 24 മണിക്കൂർ നിരീക്ഷണത്തിൽ

റാസൽഖൈമ: എമിറേറ്റിലെ 16,000 സ്ഥാപനങ്ങളിലായി 135780 സിസിടിവി ക്യാമറകൾ സ്ഥാപിച്ചതായി പോലീസ്. 24 മണിക്കൂറും പ്രവർത്തിക്കുന്ന രീതിയിലാണ് ഇവയുടെ പ്രവർത്തനം ക്രമീകരിച്ചിരിക്കുന്നതെന്ന് പോലീസ് വ്യക്തമാക്കി. മൂന്ന് മാസംവരെ ചിത്രങ്ങളും വീഡിയോയും ശേഖരിച്ചുവെയ്ക്കാൻ ഇവയ്ക്ക് കഴിയും.

റാസൽഖൈമ പോലീസിന്റെ ഹിമായ (സുരക്ഷാ) പദ്ധതിയുടെ ഭാഗമായാണ് ക്യമറകൾ സ്ഥാപിച്ചിരിക്കുന്നതെന്ന് കമാൻഡർ ഇൻ ചീഫ് മേജർ ജനറൽ അലി അബ്ദുല്ല ബിൻ അൽവാർ അൽ ന്യുഐമി പറഞ്ഞു. പള്ളികൾ,മോസ്കുകൾ, സ്കൂളുകൾ, വ്യാപാര സ്ഥാപനങ്ങൾ എന്നിവ കേന്ദ്രീകരിച്ചാണ് സിസിടിവി സ്ഥാപിച്ചിരിക്കുന്നത്.

പൊതു വാഹനങ്ങളിലും ടാക്സികളിലും അവസാനഘട്ടത്തിൽ നിരീക്ഷണ ക്യാമറകൾ സ്ഥാപിക്കും. ഈ വർഷത്തിന്റെ അവസാനത്തോടെ ഒന്നരലക്ഷം നിരീക്ഷണ ക്യാമറകൾ സ്ഥാപിക്കുമെന്ന് അൽവാർ അൽ ന്യുഐമി പറഞ്ഞു.