ഗൾഫിലെ ഏറ്റവും വലിയ വാഹന പരിശോധന-രജിസ്ട്രേഷൻ കേന്ദ്രം റാസൽഖൈമയിൽ

റസൽഖൈമ: ഗൾഫിലെ ഏറ്റവും വലിയ വാഹന പരിശോധന-രജിസ്ട്രേഷൻ കേന്ദ്രം റാസൽഖൈമയിൽ വരുന്നു. അടുത്ത രണ്ട് മാസത്തിനുള്ളിൽ നിർമ്മാണം പൂർത്തിയാകുമെന്ന് റാസൽഖൈമ പോലീസ് വ്യക്തമാക്കി. 1000 വാഹനങ്ങളെ ഉൾക്കൊള്ളാൻ കഴിയുന്ന മർട്ടി സർവ്വീസ് വില്ലേജായിരിക്കും പൂർത്തിയാകുകയെന്ന് റാസൽഖൈമ പോലീസ് പറഞ്ഞു.

അരലക്ഷം ചതുരശ്ര മീറ്റർ വിസ്തീർണ്ണത്തിൽ നിർമ്മിക്കുന്ന കേന്ദ്രത്തിൽ എട്ട് വാഹന പരിശോധനാ വരികൾ ഉണ്ടായിരിക്കും. രാവിലെയും വൈകിട്ടുമായി രണ്ട് ഷിഫ്റ്റുകളിലായിരിക്കും വാഹന പരിശോധന. ഇന്ധനം നിറയ്ക്കൽ, അറ്റകുറ്റപ്പണി, നമ്പർ പ്ലേറ്റുകളുടെ നിർമ്മാണം എന്നിവയടക്കം വാഹനവുമായി ബന്ധപ്പെട്ട എല്ലാവിധ സർവ്വീസുകളും ഇവിടെ ലഭ്യമായിരിക്കും. ഇവിടെ റസ്റ്റോറന്റുകൾ, കഫറ്റീരിയകൾ, ഇൻഷുറൻസ് ഓഫീസ് എന്നിവയുള്ളതിനാൽ പൊതുജനത്തിന് ഈ സേവനം ഉപകാരപ്രദമായിരിക്കുമെന്നാണ് അധികൃതരുടെ കണക്കുകൂട്ടൽ.

സാമ്പത്തിക വികസന വിഭാഗം, കോടതികൾ, നോട്ടറി പബ്ലിക്ക് എന്നിവയും മറ്റ് സർക്കാർ വകുപ്പുകളും ഇവിടെ ആരംഭിക്കും. 360 വാഹനങ്ങൾക്ക് ഒരേ സമയം പാർക്ക് ചെയ്യാനുള്ള സൌകര്യം ഇവിടെ ഒരുക്കും. ജനറൽ റിസോഴ്സ് കമ്പനി, എമിറേറ്റ്സ് നാഷ്ണൽ ഓയിൽ കമ്പനി എന്നിവയുടെ സഹകരണത്തോടെയാണ് നിർമ്മാണം നടക്കുക. കേന്ദ്രത്തിന്റെ 95ശതമാനം നിർമ്മാണം പൂർത്തിയായതായി റാക് പോലീസ് ജനറൽ അലി അബ്ദുല്ല ബിൻ അൽവാൻ പറഞ്ഞു. വാരാന്ത്യ ദിനങ്ങളിൽ രാത്രി വൈകിയും കേന്ദ്രം പ്രവർത്തിക്കുമെന്നും അധികൃതർ പറഞ്ഞു.