ഫേസ്ബുക്കിൽ മോശം പരാമർശം നടത്തിയ ജീവനക്കാരനെ ലുലു ഗ്രൂപ്പ് പിരിച്ചുവിട്ടു

റിയാദ്: ശബരിമല സ്ത്രീ പ്രവേശനവുമായി ബന്ധപ്പെട്ട് ഫേസ്ബുക്കിൽ മോശം പരാമർശം നടത്തിയ ജീവനക്കാരനെ ലുലു ഗ്രൂപ്പ് പിരിച്ചുവിട്ടു. റിയാദ് ലുലു ഹൈപ്പർമാർക്കറ്റിലെ ജീവനക്കാരൻ ദീപകിനെയാണ് പിരിച്ചുവിട്ടത്. ഗൾഫ് രാജ്യങ്ങളിലെ ഐടി നിയമപ്രകാരമാണ് ദീപകിനെ പിരിച്ചുവിടുന്നതെന്ന് ലുലു ചീഫ് കമ്മ്യുണിക്കേഷൻ ഓഫീസർ വി നന്ദകുമാർ പറഞ്ഞു.

ദീപക് പവിത്രം എന്ന പ്രൊഫൈലിൽനിന്നാണ് ഇയാൾ ശബരിമല സ്ത്രീ പ്രവേശനവുമായി ബന്ധപ്പെട്ട് മോശം പരാമർശം നടത്തിയത്. തുടർന്ന് ലുലു ഗ്രൂപ്പ് ചെയർമാൻ എം എ യൂസഫലിയുടെ ഫേസ്ബുക്ക് വഴി ദീപകിനെ പിരിച്ചുവിടണമെന്ന് വിശ്വാസികൾ ആവശ്യപ്പെട്ടു. തുടർന്നാണ് ദീപകിനെ പിരിച്ചുവിട്ടത്.

വെള്ളപ്പൊക്കകാലത്ത് പ്രളയബാധിതരെ അധിക്ഷേപിച്ച് ഫേസ്ബുക്കിൽ പോസ്റ്റ് ചെയ്തതിന് ലുലു ജീവനക്കാരനെ പിരിച്ചുവിട്ടിരുന്നു. ഇതേത്തുടർന്ന് മതങ്ങളെയോ വ്യക്തികളെയോ അപമാനിക്കുന്നതരത്തിൽ പ്രസ്താവന നടത്തിയാൽ ജീവനക്കാരെ പിരിച്ചുവിടുമെന്ന് ലുലു ഗ്രൂപ്പ് ജീവനക്കാർക്ക് മുന്നറിയിപ്പ് നൽകിയിരുന്നു.