ജീസാൻ വിമാനത്താവളത്തിനുനേരെ ഡ്രോൺ ആക്രമണം; സൗദി സഖ്യസേന തകർത്തു

ജിദ്ദ: ജീസാനിലെ കിങ് അബ്ദുല്ല വിമാനത്താവളം ലക്ഷ്യമാക്കി യമനിലെ വിമത സൈന്യമായ ഹൂതികൾ നടത്തിയ ഡ്രോൺ ആക്രമണം സൗദി സഖ്യസേന തകർത്തു. വ്യാഴാഴ്ച വൈകിട്ടാണ് സംഭവം. യമനിലെ ഹൂതി കേന്ദ്രമായ സൻആയിൽനിന്നാണ് ആക്രമണം ഉണ്ടായതെന്ന് സഖ്യസേന വക്താവ് വ്യക്തമാക്കി.

ആക്രമണം നടത്തിയതായി സഖ്യസേന അവകാശപ്പെട്ടിട്ടുണ്ട്. ഇറാന്റെ സഹായത്തോടെ ജനവാസ കേന്ദ്രങ്ങളിലേക്ക് ഹൂതികൾ അക്രമം നടത്തുകയാണെന്ന് സൈന്യം വ്യക്തമാക്കി. സഖ്യസേനയുടെ ശക്തമായ സൈനിക നടപടി ഹൂതികൾക്കെതിരായി എല്ലാ അന്താരാഷ്ട്ര നിയമങ്ങളും പാലിച്ച് തുടരുമെന്നും സൗദി സഖ്യസേന വക്താവ് കേണൽ തുർക്കി അൽ മാലികി പറഞ്ഞു.

അതേസമയം അബ്ഹ വിമാനത്താവളത്തിനു നേരെ വ്യാഴാഴ്ച രാത്രി ആക്രമണം ഉണ്ടായിരുന്നു. ഈ ആക്രമണത്തിൽ ഇന്ത്യക്കാരൻ ഉൾപ്പെടെ ഒമ്പതുപേർക്ക് പരിക്കേറ്റിരുന്നു.