ലൈംഗിക കുറ്റവാളികളുടെ പേര് പരസ്യമാക്കാൻ സൗദി അറേബ്യ

റിയാദ്: രാജ്യത്ത് ലൈംഗിക കുറ്റകൃത്യങ്ങളിലേർപ്പെടുന്നവരുടെ പേര് പരസ്യമാക്കാൻ സൗദി അറേബ്യ തയ്യാറെടുക്കുന്നതായി റിപ്പോർട്ട്. കുറ്റവാളികളുടെ പേര് പരസ്യമാക്കുന്നത് നിയമനടപടികളുടെ ഭാഗമാക്കുന്നത് സംബന്ധിച്ച് ഷൂറാ കൗൺസിൽ വരുന്നയാഴ്ച അവസാനം വോട്ടെടുപ്പ് നടത്തുമെന്ന് ഗൾഫ് ന്യൂസാണ് റിപ്പോർട്ട് ചെയ്തിരിക്കുന്നത്.

നേരത്തെ ചില അംഗങ്ങളുടെ എതിർപ്പിനെത്തുടർന്ന് സമാനമായ ഒരു പ്രമേയം കൗൺസിൽ തടഞ്ഞിരുന്നു. കുറ്റവാളിയുടെ പേര് നൽകുന്നത് അദ്ദേഹത്തിന്റെ കുടുംബത്തെയും ദോഷകരമായി ബാധിക്കുമെന്ന വാദം ഉയർത്തിയായിരുന്നു ഇത്. അതേസമയം വാണിജ്യപരമായ കുറ്റകൃത്യങ്ങളിൽ ഏർപ്പെടുന്നവരുടെ പേരുകൾ പരസ്യമാക്കുന്നത് സൗദി ശിക്ഷാ നടപടിയുടെ ഭാഗമാക്കിയിട്ടുണ്ട്. ഇത്തരത്തിൽ പേര് പരസ്യമാക്കുന്നത് ലൈംഗിക കുറ്റകൃത്യങ്ങളിൽ ഏർപ്പെടുന്നത് കുറക്കുമെന്നാണ് ഉയരുന്ന വാദം.

Also Read : അബുദാബിയില്‍ കൊവിഡ് പിസിആര്‍ പരിശോധനാ നിരക്കില്‍ മാറ്റം

'ആന്‍റി ഹരാസ്മെന്‍റ്' നിയമവ്യവസ്ഥയുടെ ഭാഗമായി ശിക്ഷാ നടപടി കൂട്ടിച്ചേക്കാനുള്ള സുരക്ഷാ സമിതിയുടെ റിപ്പോർട്ടിന്‍റെ അടിസ്ഥാനത്തിൽ ഷൂറാ കൗൺസിൽ ബുധനാഴ്ച വോട്ടെടുപ്പ് നടത്തുമെന്നാണ് ഗൾഫ് ന്യൂസ് റിപ്പോർട്ട് ചെയ്യുന്നത്. പേര് പരസ്യമാക്കുന്നതിന് മതപരമോ നിയമപരമോ ആയ തടസമില്ലെന്ന് ഒരു നിയമോപദേേഷ്ടാവ് പറഞ്ഞതായും റിപ്പോർട്ട് ചൂണ്ടിക്കാട്ടുന്നു.

Also Read : പ്രവാസികൾക്ക് പുതിയ മാർഗനിർദേശങ്ങൾ; മടക്ക യാത്രയ്‌ക്ക് ചെയ്യേണ്ടതെന്ത്? നിലപാടറിയിച്ച് ഒമാനിലെ ഇന്ത്യൻ എംബസി

കിരീടാവകാശി മുഹമ്മദ് ബിൻ സൽമാൻ മുന്നോട്ട് വെച്ച പരിഷ്കാരങ്ങളുടെ ഭാഗമായി സ്ത്രീകളുടെ അവകാശങ്ങൾ ഉയർത്തുന്നതിനോടൊപ്പം ലൈംഗിക കുറ്റകൃത്യങ്ങൾക്കെതിരെ കർശന നിലപാട് സ്വീകരിക്കാനും സൗദി കഴിഞ്ഞ കുറച്ച് വർഷങ്ങളായി ശ്രമിക്കുന്നുണ്ട്. ലൈംഗികാതിക്രമങ്ങൾക്കെതിരെ 2018ൽ അംഗീകാരം നൽകിയ നിയമപ്രകാരം കുറ്റവാളികൾക്ക് അഞ്ച് വർഷം വരെ തടവും 300,000 സൗദി റിയാൽ വരെ പിഴയും ഏർപ്പെടുത്തിയിരുന്നു. ഇതിന് പിന്നാലെയാണ് പ്രതികൾക്കെതിരെ കടുത്ത നടപടികൾക്ക് ഭരണകൂടം തയ്യാറെടുക്കുന്നത്.