ദുബായ്: സൗദി അറേബ്യയില്‍ 3379 പേർക്ക് കൂടി കൊവിഡ്- 19 സ്ഥിരീകരിച്ചതായി ആരോഗ്യ മന്ത്രാലയം. ഇതോടെ സൗദിയിലെ കൊറോണ ബാധിതരുടെ എണ്ണം 157,612 ആയി ഉയർന്നു. അതേസമയം 2,213 പേർക്കാണ് രാജ്യത്ത് ഇന്ന് രോഗമുക്തി ലഭിച്ചതെന്നതും ശ്രദ്ധേയമാണ്. ഇതോടെ രാജ്യത്ത് രോഗമുക്തി നേടിയവരുടെ എണ്ണം 101,130 ആയിരിക്കുകയാണ്.
കഴിഞ്ഞ 24 മണിക്കുറിനിടെ 37 പേരാണ് കൊവിഡ് ബാധിച്ച് മരിച്ചത്. ഇതോടെ മരണ സംഖ്യ 1267 ആയി. നിലവില്‍ കൊവിഡ് സ്ഥിരീകരിച്ച് സൗദിയിൽ ചികിത്സയിലുള്ളത് 55215 പേരാണ്. ഇവരില്‍ 2027 പേരുടെ നില ഗുരുതരമായി തുടരുകയാണ്.
Also Read: കൊവിഡ് ബാധിച്ച് ഗൾഫിൽ 5 മലയാളികൾ കൂടി മരിച്ചു
റിയാദ് 668, ജിദ്ദ, 342, മക്ക 340, ദമ്മാം 225, ഖത്തീഫ് 216, തായിഫ് 179, മദീന 165, ഖമീസ് മുഷൈത്ത് 127, ഹുഫൂഫ് 102, എന്നിങ്ങനെയാണ് പ്രദേശങ്ങൾ തിരിച്ചുള്ള ഇന്നത്തെ രോഗബാധ. റിയാദിൽ പ്രതിദിന രോഗബാധിതരുടെ എണ്ണത്തിൽ കുറവുണ്ടായത് ഭരണകൂടത്തിന് ആശ്വാസമേകുന്നതാണ്.
ഇന്ന് മക്കയിൽ കൊവിഡ് ബാധിച്ച് ഒരു മലയാളികൂടി മരിച്ചിരുന്നു. കൊവിഡ് ചികിത്സയിലായിരുന്ന മലപ്പുറം സ്വദേശിയാണ് മക്കയിൽ മരിച്ചത്. പാണ്ടിക്കാട് പന്തല്ലൂർ മുടിക്കോട് സ്വദേശി മദാരി പുതുവീട്ടിൽ അബ്ദുൽ കരീം (60) ആണ് മരിച്ചത്. മക്ക കിംഗ് അബ്ദുൽ അസീസ് ആശുപത്രിയിലും അറഫ എമർജൻസി ആശുപത്രിയിലും ചികിത്സയിലായിരുന്നു ഇദ്ദേഹം. പിന്നീട് മക്ക അൽ നൂർ ആശുപത്രിയിലേക്ക് മാറ്റിയിരുന്നു. അവിടെ വെച്ച് ഞായറാഴ്ച രാവിലെയാണ് മരണം സംഭവിച്ചത്. മരണ സംഖ്യയിൽ കാര്യത്തിൽ ജിദ്ദ തന്നെയാണ് മുന്നിൽ 433 പേരാണ് ഇവിടെ ഇതുവരെ മരിച്ചത്. മക്കയിൽ 372ഉം റിയാദിൽ 169ഉം ആണ് മരണസംഖ്യ.