സൗദി അറേബ്യയില്‍ 30 കൊവിഡ് മരണങ്ങൾ കൂടി; 461 പുതിയ കേസുകൾ

റിയാദ്: സൗദിയിൽ ശനിയാഴ്ച 461 പേർക്ക് കൂടി കൊവിഡ്-19 സ്ഥിരീകരിച്ചു. ഇതോടെ രാജ്യത്തെ കൊവിഡ് ബാധിതരുടെ ആകെ എണ്ണം 332,790 ആയി ഉയർന്നെന്ന് ഗൾഫ് ന്യൂസ് റിപ്പോർട്ട് ചെയ്തു. ഇന്ന് 30 കൊവിഡ് മരണങ്ങൾ കൂടി ആരോഗ്യ മന്ത്രാലയം സ്ഥിരീകരിച്ചിട്ടുണ്ട്. ഇതോടെ മഹാമാരി മൂലം മരിച്ചവരുടെ എണ്ണം 4,655 ആയിരിക്കുകയാണ്.

ഇന്ന് 769 പേർക്ക് കൂടി രോഗമുക്തി ലഭിച്ചതോടെ രോഗം ഭേദപ്പെട്ടവരുടെ ആകെ എണ്ണം 316,405 ആയും ഉയർന്നു. സൗദിയിൽ ചികിത്സയിലുള്ളവരിൽ 1035 പേരുടെ നില ഗുരുതരമായി തുടരുകയാണ്. ഇന്ന് കൂടുതൽ കൊവിഡ് കേസുകൾ റിപ്പോർട്ട് ചെയ്തത് ജിദ്ദയിലാണ്, 49 പേർക്കാണ് ഇവിടെ രോഗബാധ. മക്ക 42, മദീന 40, ഹുഫൂഫ് 29, റിയാദ് 27, ഹാഇല്‍ 21, മുബറസ് 18, ഖമീസ് മുശൈത്ത് 18, ബല്‍ജുറഷി 17, യാംബു 16, ദമ്മാം 16 എന്നിങ്ങനെയാണ് പ്രധാന നഗരങ്ങളിലെ പുതിയ കൊവിഡ് കേസുകൾ.

Also Read : കാർഷിക ബില്ലിൽ പ്രതിഷേധം: ശിരോമണി അകാലിദൾ എൻഡിഎ വിട്ടു

പുതിയ കൊവിഡ് മരണങ്ങളിൽ ഏഴെണ്ണം മക്കയിലാണ്. റിയാദ് 4, ജിദ്ദ 4, ദമ്മാം 2, ത്വാഇഫ് 1, മുബറസ് 1, ഹാഇല്‍ 1, അബഹ 3, തബൂക്ക് 1, ജീസാന്‍ 2, അബൂ അരീഷ് 1, സബ്യ 1, അല്‍ബാഹ 1, റഫ്ഹ 1 എന്നിങ്ങനെയാണ് പുതിയ മരണങ്ങളുടെ വിവരങ്ങൾ.

അതേസമയം കുവൈറ്റിൽ ഇന്ന് 758 പേർക്ക് കൂടി കൊവിഡ് സ്ഥിരീകരിച്ചിട്ടുണ്ട്. ഇതോടെ ആകെ രോഗബാധിതരുടെ എണ്ണം 103,199 ആയി ഉയർന്നു. ശനിയാഴ്ച 649 പേർക്ക് രോഗമുക്തി ലഭിച്ചതോടെ, അസുഖം ഭേദപ്പട്ടവരുടെ ആകെ എണ്ണം 94,211 ആയി. രണ്ട് മരണങ്ങൾ കൂടി റിപ്പോർട്ട് ചെയ്തതോടെ രാജ്യത്തെ കൊവിഡ് മരണം 597 ആയിട്ടുമുണ്ട്.