മാസപ്പിറവി നിരീക്ഷിക്കാൻ നിർദ്ദേശം

റിയാദ്: ദുൽഹജ് മാസപ്പിറവി കണ്ടാൽ അറിയിക്കണമെന്ന് സൗദി സുപ്രീംകോടതിയുടെ നിർദ്ദേശം. ദുൽഖഅദ് 29 വ്യാഴാഴ്ചയായതിനാൽ അന്നേദിവസം മാസപ്പിറവി കാണുന്നവർ അടുത്തുള്ള സുപ്രീംകോടതിയിൽ വിവരം അറിയിക്കണമെന്നാണ് നിർദ്ദേശം. മാസപ്പിറവി വ്യാഴാഴ്ച കാണപ്പെട്ടാൽ ഓഗസ്റ്റ് 10 അറഫാ ദിനവും 11 ബലിപ്പെരുന്നാളുമായിരിക്കും.

നേരത്തെ സൗദി അറേബ്യ സ്റ്റോക്ക് എക്സ്ചേഞ്ച് ബലിപെരുന്നാള്‍ പ്രമാണിച്ച് 9 ദിവസത്തെ നീണ്ട അവധി പ്രഖ്യാപിച്ചിരുന്നു. ആഗസ്റ്റ്‌ 9 മുതല്‍ 17 വരെയാണ് അവധി പ്രഖ്യാപിച്ചിരിക്കുന്നത്.

സർക്കാർ ജീവനക്കാർക്ക് ഇക്കുറി 12 ദിവസം വരെ അവധി ലഭിക്കും. ഉമ്മുൽഖുറാ കലണ്ടർ പ്രകാരം ദുൽഹജ്ജ് നാലാം തിയ്യതി ജോലി പൂർത്തിയാക്കിയ ശേഷം ആരംഭിക്കുന്ന ബലിപ്പെരുന്നാൾ അവധി ദുൽഹജ്ജ് 16നാണ് അവസാനിക്കുക.

സൗദിയിലെ സ്വകാര്യ മേഖലയിലെ സ്ഥാപനങ്ങൾക്കും ജീവനക്കാർക്കും നാല് ദിവസമാണ് അവധി ലഭിക്കുക. ദുൽഹജ്ജ് 9 അറഫ ദിനം മുതൽ ദുൽഹജ്ജ് 12 വരെയാണ് അവധി. തൊഴിൽനിയമം അനുസരിച്ചുള്ള മിനിമം അവധിയാണിത്. കുറഞ്ഞത് നാല് ദിവസം അവധി നൽകണമെന്നാണ് നിയമം. ഇതിൽ കൂടുതൽ അവധി നൽകുന്നതിൽ സ്വകാര്യ സ്ഥാപനങ്ങൾക്ക് വിലക്കില്ല.