ഷാരൂഖാനും റസൂല്‍ പൂക്കുട്ടിയും ഷാര്‍ജ അക്ഷരമുറ്റത്ത്

ഷാര്‍ജ: ബോളിവുഡ് സൂപ്പര്‍സ്റ്റാര്‍ ഷാരൂഖാനും ഓസ്‌കാര്‍ ജേതാവ് റസൂല്‍ പൂക്കുട്ടിയും ഒരു വേദിയില്‍. ഇന്ന് വെള്ളിയാഴ്ച ഷാര്‍ജ രാജ്യാന്തര പുസ്തകമേളയില്‍ വൈകുന്നേരം 6 മണിക്ക് ബാള്‍റൂമില്‍ താരങ്ങള്‍ സിനിമാ പ്രേമികളുമായി സംവദിക്കും. ലോകം മുഴുവന്‍ ആരാധകരുള്ള ഷാരൂഖാന് മിഡില്‍ ഈസ്റ്റിലും ഇഷ്ടക്കാര്‍ ഏറെയാണ്.

ഇത്തവണത്തെ ഷാര്‍ജ പുസ്തകമേളയില്‍ ബോളിവുഡില്‍ നിന്നെത്തുന്ന ഏകതാരവും ഷാരൂഖ് ആണ്. തിരക്കിട്ട സിനിമാ ജീവിതത്തിനിടയില്‍ ആഴത്തിലുള്ള വായനക്ക് സമയം കണ്ടെത്തുന്ന വ്യക്തിയാണ് ഷാരൂഖ്. നല്ല പുസ്തകങ്ങളെ സ്‌നേഹിക്കുന്ന ഷാരൂഖ് തന്റെ വായനാ അനുഭവങ്ങളെക്കുറിച്ച് പ്രതിപാദിക്കും. ബോളിവുഡില്‍ ആള്‍റൗണ്ടറായ ഷാരൂഖാന്‍ നിര്‍മ്മാതാവ് എന്ന നിലയിലും ശ്രദ്ധിക്കപ്പെട്ടു. മൂന്ന് പതിറ്റാണ്ട് കാലത്തെ സിനിമാ ജീവിതത്തില്‍ ഹിറ്റുകള്‍ മാത്രം സമ്മാനിച്ച ഷാരൂഖ് എന്‍പതിലധികം സിനിമകളില്‍ അഭിനയിച്ചു.

Also Read: ഗൃഹാതുര സ്മരണകളുമായി സല്‍മാന്‍ രാജാവ് അല്‍ ഹുക്ം കൊട്ടാരത്തില്‍; അപൂര്‍ സന്ദര്‍ശനവുമായി സൗദി ഭരണാധികാരി

ഹിന്ദി സിനിമയില്‍ റൊമാന്റിക് നായകനായി പ്രത്യക്ഷപ്പെട്ട ഷാറൂഖ് ഇപ്പോഴും ലോകം മുഴുവനും യുവാക്കളുടെ ഹരമാണ്. മലയാളിയായ റസൂല്‍ പൂക്കുട്ടി ഓസ്‌കാര്‍ ലഭിച്ചതോടെ ലോകമറിയുന്ന പ്രതിഭയായി. സിനിമയില്‍ സൗണ്ട് എഞ്ചിനീയറിംഗിന്റെ പ്രാധാന്യം ലോകത്തിന് പരിചയപ്പെടുത്തുന്നത് റസൂല്‍ പൂക്കുട്ടിയാണ്. അദ്ദേഹം സംവിധാനം ചെയ്യുന്ന സിനിമയുടെ അണിയറ പ്രവര്‍ത്തനങ്ങള്‍ ദുബൈയില്‍ പുരോഗമിക്കുകയാണ്.

സൗണ്ട് എഞ്ചിനീയറിംഗിന്റെ ഏറ്റവും പുതിയ സാങ്കേതികത താമസിയാതെ സിനിമാ മേഖലയില്‍ പരിചയപ്പെടുത്താനുള്ള പദ്ധതി തയ്യാറാക്കി വരികയാണ് റസൂല്‍ പൂക്കുട്ടി. ഹോളിവുഡിലെയും ബോളിവുഡിലെയും പ്രതിഭകള്‍ സംഗമിക്കുന്ന വേദി ഷാര്‍ജ പുസ്തകമേളക്ക് പുത്തന്‍ അനുഭവമായിരിക്കും.

Read Latest Gulf News and Malayalam News