60 മിനിറ്റിനുള്ളിൽ ഷാർജയിൽ നിന്ന് കൽബയിലെത്താം; ഷാര്‍ജ കല്‍ബ റോഡ് തുറന്നു

ഷാർജ: ഖോർഫക്കാൻ, കൽബ മേഖലകളെ ബന്ധിപ്പിക്കുന്ന വാദി അൽ ഹില്‍ മുതൽ കൽബ വരെ നീളുന്ന റോഡിന്‍റെ ഉദ്ഘാടനം നിര്‍വഹിച്ചു. സുപ്രീംകൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് ആൽ ഖാസിമി ആണ് റോഡ് ജനങ്ങള്‍ക്കായി തുറന്ന് കൊടുത്തത്. നൂറു കോടി ദിർഹം ചെലവിട്ടാണ് റോഡ് നിര്‍മ്മിച്ചിരിക്കുന്നത്. വാദി അൽ ഹില്‍ മുതൽ കൽബ വരെ 26 കിലോമീറ്റർ ദൂരം ആണ് റോഡിനുള്ളത്.

കൽബ നഗരം വികസിപ്പിക്കുന്നതിന്‍റെ ഭാഗമായാണ് റോഡ് നിര്‍മ്മാണം തുടങ്ങിയത്. കൽബ നഗരത്തിലെ താമസക്കാർക്കും, നഗരം സന്ദര്‍ശിക്കാന്‍ എത്തുന്നവര്‍ക്കും ഉപയോഗപ്പെടുന്ന രീതിയിലാണ് റോഡ് നിര്‍മ്മിച്ചിരിക്കുന്നത്. ഇതിനായി ഷാർജ എമിറേറ്റ് ആരംഭിച്ച ഏറ്റവും പ്രധാനപ്പെട്ട പദ്ധതികളില്‍ ഒന്നാണ് റോഡ് നിര്‍മ്മാണം. റോഡ് യാഥാര്‍ഥ്യമായതോടെ ഷാർജയും കൽബയും തമ്മിലുള്ള യാത്രാ സമയം 90 മിനിറ്റ് മുതൽ 60 മിനിറ്റ് വരെ കുറയും.

Also Read: വിമാന യാത്രക്കാർക്കുള്ള നിർദേശങ്ങൾ ഇങ്ങനെ; ടെർമിനലിൽ പ്രവേശിക്കുന്നതിലും നിയന്ത്രണം, അറിയിപ്പുമായി ഒമാൻ വിമാനത്താവള കമ്പനി

8.5 കിലോമീറ്റർ നീളമുള്ള വാദി മാദിക് റോഡിൽ രണ്ട് തുരങ്കങ്ങളാണ് ഉള്ളത്. കൂടാതെ മൂന്ന് കവലകളും 10 ക്രോസിങ്ങുകളും ഉണ്ട്. 450 മീറ്റർ നീളമുള്ള തുരങ്കത്തിൽ അഞ്ച് ക്രോസിങ്ങുകളും ഒരു കവലയും ഉൾപ്പെടുന്നു. കൽബ റോഡിന്‍റെ ഇരുവശങ്ങളിലും മനോഹരമായി ചെടികള്‍ വെച്ച്പിടിപ്പിച്ചിട്ടുണ്ട്.