വിദ്യാർത്ഥിയെ ചെരുപ്പില്ലാതെ വെയിലത്തുനിർത്തി; അധ്യാപകന് ശിക്ഷ

ഷാർജ: സ്കൂളിൽവെച്ച് വിദ്യാർത്ഥിയെ ചെരുപ്പില്ലാതെ വെയിലത്തുനിർത്തിയ അധ്യാപകന് 10,000 ദിർഹം (രണ്ട് ലക്ഷത്തോളം രൂപ) പിഴ ശിക്ഷ. ശിക്ഷാ നടപടിയെന്ന പേരിലാണ് ഷാർജയിലെ ഒരു സ്കൂളിൽ 15 വയസുകാരനെ സൂപ്പർവൈസറായ അധ്യാപകൻ വെയിലത്തുനിർത്തിയത്.

അധ്യാപകന്റേത് കുട്ടിയുടെ ജീവന് ഭീഷണിയുണ്ടാക്കുന്ന പ്രവർത്തിയാണെന്ന് കോടതി നിരീക്ഷിച്ചു. കുട്ടിക്ക് നഷ്ടപരിഹാരം ലഭിക്കുന്നതിനായി കേസ് സിവിൽ കോടതിയിലേക്ക് മാറ്റി. 2018 മേയ് ഒമ്പതിനാണ് കേസിനാസ്പദമായ സംഭവം. ക്ലാസ് സമയം കഴിയുന്നതുവരെ കുട്ടിയെ അധ്യാപകൻ വെയിലത്ത് നിർത്തി. വിവരം അറിഞ്ഞ കുട്ടിയുടെ പിതാവാണ് ഷാർജ പോലീസിൽ പരാതി നൽകിയത്.

ഉച്ചസമയത്തെ പൊള്ളുന്ന വെയിലിൽ തന്റെ മകന് ചെരുപ്പില്ലാതെ നടക്കേണ്ടിവന്നു. ക്ലാസ് അവസാനിച്ചപ്പോൾ ചെരുപ്പ് തിരികെ ചോദിച്ചെങ്കിലും അധ്യാപകൻ നൽകിയില്ല. പകരം സഹപാഠികളുടെ മുന്നിൽവെച്ച് തന്റെ മകനെ അധ്യാപകൻ അപമാനിച്ചു. ഇതോടെ കുട്ടിക്ക് ചെരുപ്പില്ലാതെ സ്കൂൾ ബസിൽ കയറേണ്ടിവന്നു. ബസിലെ ജീവനക്കാരാണ് അധ്യാപകനിൽനിന്നും കുട്ടിയുടെ ചെരിപ്പ് തിരികെ വാങ്ങി നൽകിയതെന്നും പരാതിയിൽ പറയുന്നു.