സൗദിയിലെ ഈ വിമാനത്താവളങ്ങളിൽ സന്ദർശക വിസക്കാർക്ക് വിലക്ക്

റിയാദ്: സൗദിയിലെ നാല് വിമാനത്താവളങ്ങളിൽ സന്ദർശക വിസക്കാർക്ക് നിരോധനം ഏർപ്പെടുത്തി. ഓഗസ്റ്റ് 12 വരെയെത്തുന്ന മുസ്ലിങ്ങൾക്കാണ് വിലക്ക് ഏർപ്പെടുത്തിയിരിക്കുന്നത്. ബിസിനസ് സന്ദർശക വിസ, തൊഴിൽ സന്ദർശക വിസ, കുടുംബ സന്ദർശക വിസ എന്നീ മൂന്ന് വിഭാഗത്തിലുള്ളവർക്കാണ് താത്കാലിക വിലക്ക് ഏർപ്പെടുത്തിയിരിക്കുന്നത്.

ജിദ്ദ കിങ് അബ്ദുൾ അസീസ്, മദീനയിലെ പ്രിൻസ് മുഹമ്മദ് ബിൻ അബ്ദുൽ അസീസ്, യാമ്പുവിലെ പ്രിൻസ് അബ്ദുൽ മുഹ്സിൻ ബിൻ അബ്ദുൽ അസീസ്, തായിഫിലെ ജനറൽ എയർപ്പോർട്ട് എന്നിവിടങ്ങളിലാണ് സന്ദർശക വിസക്കാർക്ക് വിലക്ക്.

ഹജ്കാലത്തെ പതിവ് നിയന്ത്രണത്തിന്റെ ഭാഗമായാണ് വിലക്കെന്ന് അധികൃതർ വ്യക്തമാക്കി. ഓഗസ്റ്റ് 12 വരെ ഈ വിമാനത്താവളങ്ങളിലേക്ക് ബുക്ക് ചെയ്തിട്ടുള്ള ടിക്കറ്റുകൾ റദ്ദാക്കുകയോ മറ്റ് സെക്ടറുകളിലേക്ക് യാത്രചെയ്യുകയോ ചെയ്യാം. ഈ വിമാനത്താവളങ്ങളിലേക്ക് നേരിട്ട് രാജ്യേന്തര യാത്രക്കാരെ സ്വീകരിക്കരുതെന്നാണ് എയർലൈനുകൾക്കുള്ള നിർദ്ദേശം.

കഴിഞ്ഞ ദിവസം ജിദ്ദയിലേക്കും മദീനയിലേക്കും കേരളത്തിൽനിന്നും യാത്രചെയ്തവരെ വിലക്കിയിരുന്നു. റിയാദ്, ദമാം എന്നീ സൗദിയിലെ മറ്റ് എർപ്പോർട്ടുകളിലേക്ക് വിലക്കില്ല. സന്ദർശക വിസക്കാർക്ക് മാത്രമാണ് വിലക്ക്. തൊഴിൽ വിസക്കാർക്ക് പതിവുപോലെ യാത്രചെയ്യാം.