ആത്മഹത്യാ പ്രവണതയുള്ളവർ ക്രിമിനലുകളല്ല, ഇരകളാണെന്ന് യുഎഇയിലെ അൽ ബാർഷ പോലീസ്

ദുബായ്: ആത്മഹത്യ ചെയ്യാൻ ശ്രമിക്കുന്നവരെ ക്രിമിനലുകളായി പരിഗണിക്കില്ലെന്ന് അൽ ബാർഷ പോലീസ്. അവരെ ഇരകളായാണ് പരിഗണിക്കുകയെന്ന് അൽ ബാർഷ പോലീസ് സ്റ്റേഷനിലെ മുതിർന്ന ഉദ്യോഗസ്ഥൻ അബ്ദുൾ റഹീം ബിൻ ഷരീഫ് പറഞ്ഞു.

'വിൻഡോ ടു ഹെൽപ്പ്' എന്ന പദ്ധതിയിലൂടെയാണ് അൽ ബാർഷ പോലീസ് ആത്മഹത്യാ ശ്രമം നടത്തുന്നവരെ സഹായിക്കുക. ആത്മഹത്യ ചെയ്യാൻ ശ്രമിക്കുന്നവരുടെ പ്രശ്നങ്ങൾ പഠിച്ച് അവ പരിഹരിക്കാനുള്ള സഹായമാണ് തങ്ങൾ ചെയ്തു നൽകുകയെന്ന് റഹീം ബിൻ ഷരീഫ് പറഞ്ഞു.

വ്യക്തിപരമായ പ്രശ്നങ്ങൾമൂലം മാനസിക സംഘർഷം അനുഭവിക്കുകയും ആത്മഹത്യാ ശ്രമം നടത്തുന്നവരെയും സഹായിക്കുകയാണ് പോലീസിന്റെ പദ്ധതി. അത്തരക്കാരെ സഹായിക്കുന്നതിനായി ഡോക്ടർമാരുടെ സേനവനം പ്രയോജനപ്പെടുത്തും- റഹീം ബിൻ ഷരീഫ് പറഞ്ഞു.

ആത്മഹത്യക്ക് ശ്രമിക്കുന്നവർക്ക് ആറ് മാസം തടവും 5,000 ദിർഹം പിഴയും ഏർപ്പെടുത്താനാണ് യുഎഇയിലെ നിയമം അനുശാസിക്കുന്നത്. ഇനിമുതൽ ശിക്ഷയ്ക്കല്ല ചികിത്സയ്ക്കായിരിക്കും പ്രാധാന്യം നൽകുയെന്ന് അൽ ബാർഷ പോലീസ് പറയുന്നു. വരും കാലത്ത് യുഎഇയിലെ എല്ലാ പോലീസ് സ്റ്റേഷനുകളിലേക്കും 'വിൻഡോ ടു ഹെൽപ്പ്' എന്ന പദ്ധതി വ്യാപിപ്പിക്കുമെന്ന് അൽ ബാർഷ പോലീസ് ഉദ്യോഗസ്ഥൻ പറഞ്ഞു.