കുവൈറ്റില്‍ മലയാളി നഴ്‍സ് കൊവിഡ് ബാധിച്ച് മരിച്ചു; യുഎഇയിൽ 1538 കൊവിഡ് കേസുകൾ കൂടി

കുവൈറ്റ് സിറ്റി: കുവൈറ്റിൽ കൊവിഡ് ബാധിച്ച് ചികിത്സയിലായിരുന്ന മലയാളി നഴ്സ് മരിച്ചു. റാന്നി കുടമുരുട്ടി സ്വദേശിനി സുമ കുമാരി (48) ആണ് മരിച്ചതെന്ന് ഏഷ്യാനെറ്റ് ന്യൂസാണ് റിപ്പോർട്ട് ചെയ്തത്. ഹോം കെയർ നഴ്സായി ജോലി ചെയ്യുകയായിരുന്ന ഇവർ അബ്ദുള്ള അൽ മുബാറക് ഫീൽഡ് ഹോസ്‍പിറ്റലിൽ വച്ചാണ് മരണപെട്ടത്.

കഴിഞ്ഞ മാസമാണ് സുമ കുമാരി നാട്ടിൽ നിന്നും കുവൈറ്റിലെത്തിയതെന്നാണ് റിപ്പോർട്ടുകൾ. അതേസമയം ഇന്ന് രാവിലെ വരെയുള്ള കണക്കുകൾ പ്രകാരം കുവൈറ്റിൽ 1,14,744 പേർക്കാണ് കൊവിഡ് സ്ഥിരീകരിച്ചിരിക്കുന്നത്. വെള്ളിയാഴ്ച 649 പേർ കൂടി രോഗമുക്തി നേടിയതോടെ രോഗമുക്തരുടെ ആകെ എണ്ണം 1,06,495 ആയിട്ടുണ്ട്. ചികിത്സയിലുള്ള 7559 പേരിൽ 136 പേർ തീവ്രപരിചരണ വിഭാഗത്തിലാണ്.

Also Read : യുഎയിലേക്കുള്ള യാത്രക്കാർക്ക് സുപ്രധാന അറിയിപ്പ്; പുതിയ നിർദേശങ്ങളുമായി വിമാനക്കമ്പനികൾ

യുഎഇയിൽ പ്രതിദിന രോഗബാധയിൽ ഇന്നും വർധനവ് രേഖപ്പെടുത്തിയിട്ടുണ്ട്. ആരോഗ്യ മന്ത്രാലയം പുറത്തുവിട്ട കണക്കുകൾ പ്രകാരം 1538 പേർക്കാണ് കഴിഞ്ഞ 24 മണിക്കൂറിനിടെ കൊവിഡ് സ്ഥിരീകരിച്ചത്. ഇതോടെ രാജ്യത്തെ ആകെ കൊവിഡ് കേസുകൾ 114387 ആയി ഉയർന്നിരിക്കുകയാണ്.

കഴിഞ്ഞ 24 മണിക്കൂറിനിടെ 1,411 പേർക്ക് കൂടി രോഗമുക്തി ലഭിച്ചതോടെ കൊവിഡ് രോഗമുക്തി നേടിയവരുടെ എണ്ണം 106354 ആയിരിക്കുകയാണ്. ഇന്ന് 4 മരണങ്ങൾ കൂടി സ്ഥിരീകരിച്ചതോടെ കൊവിഡ് മരണങ്ങളുടെ എണ്ണം 459 ആയി ഉയർന്നെന്നും ആരോഗ്യ മന്ത്രാലയം വ്യക്തമാക്കി. 130567 സാമ്പിളുകളാണ് രാജ്യത്ത് കഴിഞ്ഞദിവസം പരിശോധിച്ചത്.

Also Read : പ്രവാസികളെ 'പിഴിഞ്ഞ്' ദുബായ്; വിലക്കിനിടെ എങ്ങനെ കുവൈറ്റിലെത്താം? നിയന്ത്രണം തുടരുമെന്ന് അധികൃതർ

സൗദി അറേബ്യയിൽ ശനിയാഴ്ച 359 പുതിയ കൊവിഡ് കേസുകൾ കൂടി റിപ്പോർട്ട് ചെയ്തു. 370 പേർ കൊവിഡ് മുക്തരായിട്ടുമുണ്ട്. ഇതോടെ രാജ്യത്ത് ആകെ റിപ്പോർട്ട് ചെയ്ത കേസുകളുടെ എണ്ണം 3,41,854 ആയിരിക്കുകയാണ്. ഇതിൽ 3,28,165 പേർ ഇതിനോടകം രോഗമുക്തി നേടിയെന്നും കണക്കുകൾ വ്യക്തമാക്കുന്നു. കഴിഞ്ഞ 24 മണിക്കൂറിനിടെ 21 മരണങ്ങളാണ് രാജ്യത്ത് റിപ്പോർട്ട് ചെയ്തത്.