യുഎഇയിലെ കൊവിഡ് വാക്സിൻ പരീക്ഷണം; അദ്യ ഡോസ് സ്വീകരിച്ച് ആരോഗ്യ മന്ത്രി

അബുദാബി: രാജ്യത്ത് അടിയന്തിര ഘട്ടങ്ങളിൽ ഉപയോഗിക്കാൻ അനുമതി നൽകിയ കൊവിഡ് വാക്സിന്‍റെ ആദ്യ ഡോസ് സ്വീകരിച്ച് യുഎഇ ആരോഗ്യ മന്ത്രി അബ്‍ദുല്‍ റഹ്‍മാന്‍ ബിന്‍ മുഹമ്മദ് അല്‍ ഉവൈസി. ആരോഗ്യ പ്രവർത്തകർക്ക് അടിയന്തിര ഘട്ടത്തിൽ ഉപയോഗിക്കുന്നതിന് അനുമതി നൽകിയ വാക്സിന്‍റെ ആദ്യ ഡോസാണ് മന്ത്രി സ്വീകരിച്ചതെന്ന് അന്താരാഷ്ട്ര മാധ്യമമായ ഗൾഫ് ന്യൂസാണ് റിപ്പോർട്ട് ചെയ്തത്.

ഹെൽത്ത് ആൻഡ് പ്രിവൻഷൻ മന്ത്രാലയം അടുത്തിടെയായിരുന്നു യുഎഇയിൽ അടിയന്തര സന്ദര്‍ഭങ്ങളിൽ കൊവിഡ് വാക്സിൻ ഉപയോഗിക്കാൻ അനുമതി നൽകിയത്. ആരോഗ്യപ്രവർത്തകരുടെ സംരക്ഷണത്തിനായാണ് വാക്സിന് അനുമതി നൽകിയതെന്നാണ് ആരോഗ്യ മന്ത്രി അല്‍ ഉവൈസി വ്യക്തമാക്കിയിരിക്കുന്നത്. 'കൊവിഡ്-19 രോഗികളുമായി അടുത്ത സമ്പർക്കം പുലർത്തുന്ന ആരോഗ്യ പ്രവർത്തകരെ സംരക്ഷിക്കുന്നതിനും അവരുടെ സുരക്ഷ ഉറപ്പുവരുത്തുന്നതിനുമുള്ള രാജ്യത്തിന്‍റെ നടപടികളുടെ ഭാഗമായാണ് അടിയന്തിര ഉപയോഗത്തിനായി വാക്സിൻ നൽകുന്നത്' ഉവൈസി പറഞ്ഞു.

Also Read : യുഎഇയിലേക്ക് മടങ്ങിയെത്തുന്നവർ ശ്രദ്ധിക്കുക; പുതിയ മാർഗനിർദേശങ്ങളും പ്രഖ്യാപനങ്ങളും ഇങ്ങനെ

കൊവിഡ് വാക്സിന്‍റെ ക്ലിനിക്കൽ പരീക്ഷണങ്ങൾ യു‌എഇയിൽ നല്ല ഫലങ്ങളാണ് കാണിക്കുന്നതെന്നും അദ്ദേഹം വ്യക്തമാക്കി. 'വാക്സിൻ സുരക്ഷിതവും ഫലപ്രദവുമാണ്, ഇത് കൊവിഡ്-19 മഹാമാരി മൂലമുണ്ടാകുന്ന നഷ്ടം കുറയ്ക്കുന്നതിനും ജീവൻ രക്ഷിക്കുന്നതിനും സഹായിക്കും,' മന്ത്രി പറഞ്ഞു.


Also Read : അന്താരാഷ്ട്ര യാത്രിക‍ര്‍ക്ക് പുതിയ മാർഗനിർദ്ദേശവുമായി സൗദി

കഴിഞ്ഞദിവസം പുറത്ത് വന്ന റിപ്പോർട്ടുകളനുസരിച്ച് ചൈനീസ് കമ്പനി വികസിപ്പിച്ച വാക്സിനാണ് യുഎഇയിൽ അടിയന്തിരഘട്ടങ്ങളിൽ ഉപയോഗിക്കുന്നതിനുള്ള അനുമതി ലഭിച്ചിരുന്നത്. പരീക്ഷണം ആരംഭിച്ച് ആറാഴ്ചയ്ക്ക് ശേഷമാണ് രാജ്യത്ത് ഭാഗികമായി വാക്സിൻ ലഭ്യമാക്കുന്നത്.