സൗദിയിൽ കുടുങ്ങിയവർക്കായി നടപടി വേണമെന്ന് മുഖ്യമന്ത്രി

തിരുവനന്തപുരം: സൗദി അറേബ്യയിലെ റിയാദില്‍ കുടുങ്ങിയ മലയാളികള്‍ ഉള്‍പ്പടെ 72 ഇന്ത്യക്കാരെ സുരക്ഷിതമായി നാട്ടിലെത്തിക്കുന്നതിന് കേന്ദ്ര സര്‍ക്കാരിന്റെ ഇടപെടല്‍ ഉണ്ടാകണമെന്ന് മുഖ്യമന്ത്രി പിണറായി വിജയന്‍ ആവശ്യപ്പെട്ടു.

ഇക്കാര്യത്തില്‍ അടിയന്തരമായി ഇടപെടണമെന്ന് അഭ്യര്‍ഥിച്ചു കേന്ദ്ര വിദേശകാര്യമന്ത്രി സുഷമ സ്വരാജിന് കത്തയച്ചതായും മുഖ്യമന്ത്രി അറിയിച്ചു.റിയാദ് കിംഗ് അബ്ദുള്ള ഇക്കണോമിക് സിറ്റി പ്രോജക്ടിന് വേണ്ടി ദുബായില്‍നിന്ന് എത്തിച്ചവരാണ് ഇവര്‍.

കടുത്ത പ്രതിസന്ധികളെ അതിജീവിച്ച്‌ റിയാദിലെ എക്സിറ്റ് 8ന് അടുത്തുള്ള ലേബര്‍ ക്യാമ്പിൽ കഴിയുന്ന ഇവര്‍ക്ക് കഴിഞ്ഞ ഒരു വര്‍ഷത്തിലേറെയായി ശമ്ബളവും ലഭിക്കുന്നില്ല. ഓഗസ്റ്റ് മുതല്‍ ഇവരുടെ ഇക്കാമ പുതുക്കി നല്‍കിയിട്ടില്ല. അതിനാല്‍ ലേബര്‍ ക്യാമ്പിന് വെളിയില്‍ പോകാന്‍ കഴിയുന്നില്ല. ഈ സാഹചര്യത്തിലാണ് അടിയന്തര ഇടപെടല്‍ ആവശ്യപ്പെട്ട് മുഖ്യമന്ത്രി വിദേശകാര്യമന്ത്രിക്കു കത്തെഴുതിയത്.