ഒമാനിൽ അടുത്ത ആറുമാസത്തേക്ക് വിസ അനുവദിക്കില്ല

മസ്‌കറ്റ്: 87 തസ്‌തികളിലേക്ക് ഒമാനിൽ ആറുമാസത്തേക്ക് വിദേശികൾക്ക് വിസ അനുവദിക്കേണ്ടെന്ന് ഭരണകൂടം തീരുമാനിച്ചു. വിസ അനുവദിക്കില്ലെന്ന് വ്യക്തമാക്കി മനുഷ്യവിഭവശേഷി മന്ത്രി അബ്ദുള്ള ബിൻ നാസർ അൽ ബക്രി ഉത്തരവ് പുറത്തിറക്കി. സ്വദേശിവൽക്കരണം ശക്തമാക്കുന്നതിനാണ് പുതിയ നടപടി. ഇന്ത്യക്കാരടക്കമുള്ള വിദേശികളെ ആറുമാസത്തെ വിസ നിരോധനം സാരമായി ബാധിക്കും.

ഐ.ടി, അക്കൗണ്ടിങ് ആന്‍ഡ് ഫിനാന്‍സ്, മാര്‍ക്കറ്റിങ് ആന്‍ഡ് സെയില്‍സ്, അഡ്‍മിനിസ്‌ട്രേഷന്‍ ആന്‍ഡ് ഹ്യൂമന്‍ റിസോഴ്‌സസ്, ഇന്‍ഷുറന്‍സ്, ഇന്‍ഫര്‍മേഷന്‍ ആന്‍ഡ് മീഡിയ, മെഡിക്കല്‍, എന്‍ജിനീയറിങ്, ടെക്‌നിക്കല്‍, എയര്‍പോര്‍ട്ട് എന്നീ വിഭാഗങ്ങളിലെ തസ്തികകളിലാണ് നിരോധനം. ഐടിയുടെ കീഴൽ വരുന്ന കമ്പ്യൂട്ടർ എൻജിനീയറിങ്, ഗ്രാഫിക് ഡിസൈനിങ്, കമ്പ്യൂട്ടർ പ്രോഗ്രാമിങ്, കമ്പ്യൂട്ടർ ഓപ്പറേറ്റർ, ഇലക്ട്രോണിക്‌സ് ടെക്‌നീഷ്യൻ എന്നീ തസ്‌തികകളിൽ ധാരാളം ഇന്ത്യക്കാർ ജോലി ചെയ്യുന്നുണ്ട്. ഈ തസ്‌തികൾക്കെല്ലാം വിലക്ക് ബാധകമാകും.