ചൈനയിൽ നിയന്ത്രണം വിട്ട ട്രക്ക് 31 കാറുകളിൽ ഇടിച്ച് 15 മരണം

ബീജിങ്: ചൈനയിൽ നിയന്ത്രണം വിട്ട ട്രക്ക് കാറുകളിലേയ്ക്ക് ഇടിച്ചു കയറി 15 മരണം. ഹൈവേയിലെ ടോൾ പ്ലാസയിൽ നിര്‍ത്തിയിട്ടിരുന്ന 31 കാറുകള്‍ക്ക് മേലാണ് ട്രക്ക് പാഞ്ഞു കയറിയത്. 44 പേര്‍ക്ക് അപകടത്തിൽ പരിക്കേറ്റു. വടക്കുപടിഞ്ഞാറൻ ചൈനയിലെ ലാൻസൗവിലാണ് സംഭവമുണ്ടായത്.

എക്സ്പ്രസ് വേയിലെ ഇറക്കത്തിൽ വെച്ച് ട്രക്കിന്‍റെ നിയന്ത്രണം നഷ്ടപ്പെടുകയായിരുന്നു. തുടര്‍ന്നാണ് ടോള്‍ പ്ലാസയിൽ നിര്‍ത്തിയിട്ടിരുന്ന കാറുകള്‍ക്കുമേൽ ട്രക്ക് പാഞ്ഞു കയറിയത്. ട്രക്ക് ഡ്രൈവര്‍ ഈ പാതയിൽ ആദ്യമായാണ് വാഹനമോടിക്കുന്നതെന്നാണ് പ്രാദേശിക മാധ്യമങ്ങളുടെ റിപ്പോര്‍ട്ട്.

അപകടത്തിന്‍റെ ദൃശ്യങ്ങള്‍ ഔദ്യോഗിക ടെലിവിഷൻ ചാനൽ പുറത്തുവിട്ടിട്ടുണ്ട്.