ആ കുരുന്ന് എപ്പോഴും ചിരിക്കുമായിരുന്നു...

പാല്‍ കുടിക്കാത്തതിന് വളര്‍ത്തച്ഛന്‍ നല്‍കിയ ശിക്ഷ, പാതിരാത്രി മൂന്നു മണിക്ക് വീടിന് പുറത്തുനില്‍ക്കാന്‍. മൂന്നാം വയസില്‍ അവള്‍ മരണപ്പെട്ടുവെന്ന് ഞെട്ടലോടെ കേള്‍ക്കുകയാണ് ലോകം. ഇത്രവലിയ ശിക്ഷ ഏറ്റുവാങ്ങാന്‍ എന്തു തെറ്റാണ് ആ കുരുന്ന് ചെയ്‍തത്. ഒരുപക്ഷേ, ജനിച്ചുപോയി എന്നതാകും.

ജീവിതം തന്നെ അവളോട് പെരുമാറിയത് ക്രൂരമായാണ്. നളന്ദയിലെ ഒരു അനാഥമന്ദിരത്തിന് അടുത്തുള്ള കുറ്റിക്കാട്ടില്‍ നിന്നാണ് ചോരക്കുഞ്ഞായി അവളെ കണ്ടെത്തുന്നത്. അറിവിന്‍റെ ദേവതയായ സരസ്വതിയുടെ പേരാണ് മദര്‍ തെരേസ അനത് സേവ സന്‍സ്ഥാന്‍ കുഞ്ഞിന് നല്‍കിയത്.

പ്രായം രണ്ടര തികയുംവരെ സ്ഥാപനത്തിന്‍റെ മാനേജര്‍ ബബിത കുമാരിയുടെ കണ്‍മുന്നിലാണ് അവള്‍ വളര്‍ന്നത്. അതിന് ശേഷമാണ് അമേരിക്കയില്‍ താമസമാക്കിയ ഇന്ത്യന്‍ ദമ്പതികള്‍, വെസ്ലിയും സിനിയും കുഞ്ഞിനെ ദത്തെടുക്കാന്‍ ഇന്ത്യയില്‍ എത്തുന്നത്.

കഴിഞ്ഞ വര്‍ഷം ജൂണ്‍ 23ന് ആണ് സരസ്വതിയെ ദത്തെടുത്തവര്‍ അമേരിക്കയിലേക്ക് കൊണ്ടുപോയത്. എല്ലാ രേഖകളും നടപടികളും പൂര്‍ത്തിയാക്കിയായിരുന്നു ഇത് - ബബിത കുമാരി ന്യൂസ് 18നോട് പറഞ്ഞു.

'അവളെപ്പോഴും ചിരിക്കുമായിരുന്നു' ഷെറിനെക്കുറിച്ച് അവര്‍ ഓര്‍ക്കുന്നു.

ഒക്ടോബര്‍ ഏഴിന് ആണ് അമേരിക്കയിലെ ടെക്സസ് സംസ്ഥാനത്തെ ഡാളസ് നഗരത്തിലെ വീട്ടില്‍ നിന്ന് ഷെറിനെ കാണാതാകുന്നത്. പാല്‍കുടിക്കാന്‍ മടികാണിച്ച കുഞ്ഞിനെ വളര്‍ത്തച്ഛന്‍ പുറത്തിറക്കി വിട്ടു. പതിനഞ്ച് മിനിറ്റിനുള്ളില്‍ കുട്ടിയെ നോക്കിയെങ്കിലും കണ്ടെത്താനായില്ല.

നേരം പുലരുംവരെ കാത്തിരിക്കാന്‍ ആയിരുന്നു വെസ്ലിയുടെ തീരുമാനം. കുട്ടിയെ കാണാതെ പോയ സമയത്ത് ഇയാളുടെ ഭാര്യ ഉറക്കത്തിലായിരുന്നുവെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്‍തിരുന്നു. ഹെലികോപ്ടര്‍ ഉള്‍പ്പെടെയുള്ള സംവിധാനങ്ങള്‍ ഉപയോഗിച്ച് ആഴ്‍ച്ചകളായി ഷെറിന് വേണ്ടി തെരച്ചില്‍ തുടരുകയായിരുന്നു.

ഇതിനിടയിലാണ് റിച്ചാഡ്‍സണ്‍ പട്ടണത്തിന്‍റെ പ്രാന്തപ്രദേശങ്ങളില്‍ ഒന്നില്‍ ഷെറിന്‍ മാത്യൂസിന്‍റെത് എന്ന് വിശ്വസിക്കുന്ന മൃതദേഹം പോലീസ് കണ്ടെത്തിയത്.

The tragic death of 3-year-old Sherin Mathews in Richardson

Police authorities in Texas' Richardson have found out the dead body of a 3 year-old-girl, raising doubts it could be that of Sherin Mathews, who was missing since October.

(വിവരങ്ങള്‍ - ഹഫ് പോസ്റ്റ് ഇന്ത്യ)