മകനെയും മകളെയും അമ്മ വിവാഹം കഴിച്ചു; മകള്‍ക്ക് ശിക്ഷ

ഒക്ലഹോമ: സ്വന്തം അമ്മയെ വിവാഹം കഴിച്ചതിന് 26കാരിയായ മകള്‍ക്ക് കോടതി 10 വര്‍ഷം തടവ് വിധിച്ചു. യുഎസ്സിലെ ഒക്ലഹോമയിലാണ് അമ്മ തന്റെ മകളെയും മകനെയും വിവാഹം കഴിച്ച അപൂര്‍വ്വ സംഭവം. 44 കാരിയായ പട്രീഷ്യ സ്പാന്‍ കഴിഞ്ഞ മാര്‍ച്ചിലാണ് 25 കാരിയായ തന്‍റെ മകള്‍ മിസ്റ്റി സ്പാന്നിനെ വിവാഹം കഴിക്കുന്നത്. മിസ്റ്റി സ്പാന്നിനെ കൂടാതെ രണ്ടു കുട്ടികള്‍ കൂടിയുണ്ട് ഇവര്‍ക്ക്.

മൂന്ന് കുട്ടികളുടെയും രക്ഷാകര്‍തൃ ചുമതല വളരെ നേരത്തെ തന്നെ പട്രീഷ്യയ്ക്ക നഷ്ടമായിരുന്നു. അന്ന് മുതല്‍ മുത്തശ്ശിയാണ് ഈ മൂന്ന് കുട്ടികളെയും ദത്തെടുത്ത് വളര്‍ത്തിയത്. വിവാഹത്തിന് മുമ്പ് പട്രീഷ്യയുടെ യഥാര്‍ത്ഥ പേര് പട്രീഷ്യ ആന്‍ ക്ലെയ്ടണ്‍ എന്നായിരുന്നു. അടുത്തിടെയാണ് പേര് പട്രീഷ്യ സ്പാന്‍ എന്നാക്കി മാറ്റിയത്.

മകളുടെ ജനന സര്‍ട്ടിഫിക്കറ്റിലെ പേരിനൊപ്പം തന്റെ പേരിന്റെ അംശം ഇല്ലാത്തതു കൊണ്ട് മകളെ താന്‍ വിവാഹം ചെയ്യുന്നത് നിയമ വിരുദ്ധമല്ലെന്നാണ് കരുതിയതെന്നാണ് പട്രീഷ്യ കോടതിയെ അറിയിച്ചത്. വിവാഹം റദ്ദാക്കണമെന്നാവശ്യപ്പെട്ട് കഴിഞ്ഞ സപ്തംബറില്‍ മിസ്സി കോടതിയെ സമീപിച്ചതോടെയാണ് സംഭവം പുറംലോകമറിയുന്നത്.

അമ്മയെ വിവാഹം കഴിക്കുന്നത് തെറ്റല്ലെന്ന് അമ്മ പട്രീഷ്യ തെറ്റിദ്ധരിപ്പിച്ചെന്ന് മിസ്റ്റി പറയുന്നു. രക്തബന്ധത്തിലുള്ളവരെ വിവാഹം ചെയ്യുന്നത് ഒക്ലഹോമയില്‍ ശിക്ഷ ലഭിക്കാവുന്ന കുറ്റകൃത്യമാണ്. കേസില്‍ പത്ത് വര്‍ഷം തടവ് മിസ്റ്റിക്ക് ലഭിച്ചിട്ടുണ്ടെങ്കിലും അനുഭവിക്കേണ്ടതില്ല. 2008 ല്‍ പട്രീഷ്യ 18 കാരനായ തന്‍റെ മകനെയും വിവാഹം കഴിച്ചിരുന്നെങ്കിലും അമ്മയെ വിവാഹം കഴിക്കാന്‍ പാടില്ലെന്ന് തിരിച്ചറിഞ്ഞ മകന്‍ വിവാഹം റദ്ദാക്കാന്‍ ആവശ്യപ്പെടുകയായിരുന്നു.