ബെയ്ജിങ്: കൊറോണ വൈറസ് ബാധിച്ച് ചൈനയില് മരിച്ചവരില് ഒരു അമേരിക്കക്കാരിയും. ചൈനീസ് ഔദ്യോഗിക വാര്ത്താ ഏജന്സിയായ സിന്ഹുവയാണ് വാര്ത്ത പുറത്തുവിട്ടത്. കൊറോണ വൈറസ് പടരുന്നതിനിടെ ആദ്യമായാണ് ചൈനയില് ഒരു വിദേശി മരിക്കുന്നത്.
Also Read: കൊറോണ: മരണം 722; സാര്സിനേക്കാള് വലിയ ദുരന്തം
പുതിയ കൊറോണ വൈറസ് ആദ്യമായി കണ്ടെത്തിയ മധ്യ ചൈനയിലെ വുഹാനിലാണ് അമേരിക്കന് പൗരന് മരിച്ചത്. വൈറസ് ബാധ സ്ഥിരീകരിച്ച് ചികിത്സയിലായിരുന്ന 60 വയസ്സുള്ള സ്ത്രീയാണ് മരിച്ചതെന്നാണ് ഇവരുമായി ബന്ധമുള്ളവര് പറയുന്നത്.
കൊറോണ വൈറസ് ബാധിച്ചുള്ള ആദ്യ യുഎസ് പൗരയുടെ മരണം ബെയ്ജിങ്ങിലെ യുഎസ് എമ്പസി സ്ഥിരീകരിച്ചു.മരിച്ചയാളെക്കുറിച്ചുള്ള കൂടുതല് വിവരങ്ങള് എമ്പസി പുറത്തുവിട്ടിട്ടില്ല. കുടുംബത്തിന്റെ സ്വകാര്യതയെ മാനിച്ചുകൊണ്ട് അവരെക്കുറിച്ചുള്ള വിവരങ്ങള് മാധ്യമങ്ങള്ക്ക് ഉള്പ്പെടെ നല്കിയിട്ടില്ലെന്ന് എമ്പസി വക്താവ് പറഞ്ഞു.
Also Read: കൊറോണ കാലത്ത് ഒരു സമൂഹ വിവാഹം; വൈറസിനെ ഭയക്കാതെ 6000 ദമ്പതികള്
പുതിയ കൊറോണ വൈറസ് ബാധിച്ച് 722 പേരാണ് ഇതുവരെ മരിച്ചത്. ഇതില് 720 മരണവും ചൈനയിലാണ്. ഫിലപ്പീന്സിലും ഹോങ്കോങ്ങിലും ഓരോ മരണം റിപ്പോര്ട്ട് ചെയ്തു. ഇതോടെ സാര്സിനെക്കാള് വലിയ ദുരന്തമായി പുതിയ കൊറോണ വൈറസ് ബാധ മാറി. കൊറോണ ബാധിച്ച് മരിച്ചവരുടെ എണ്ണം 2002-2003 കാലത്ത് സാര്സ് (സിവിയര് അക്യൂട്ട് റെസ്പിരേറ്ററി സിന്ഡ്രോം) ബാധിച്ച് ചൈനയില് മരിച്ചവരുടെ എണ്ണത്തെ മറികടന്നു.
രോഗബാധ സ്ഥിരീകരിച്ചവരുടെ എണ്ണം 34546 ആയി ഉയര്ന്നു. ഓരോ ദിവസവും രോഗബാധ സ്ഥിരീകരിക്കുന്നവരുടെ എണ്ണത്തില് കുറവുണ്ടാകാത്തതിനാല് ഇനിയും മരണസംഖ്യ ഉയരുമോ എന്ന ആശങ്ക നിലനില്ക്കുന്നുണ്ട്. ശനിയാഴ്ച ഹുബെയില് മാത്രം 81 പേരാണ് മരിച്ചത്. ഇതുവരെ 25 രാജ്യങ്ങളിലാണ് വൈറസ് ബാധ സ്ഥിരീകരിച്ചത്.
Also Read: കൊറോണ വൈറസ് മനുഷ്യരിലെത്തിയത് ഈനാംപേച്ചികളിലൂടെയെന്ന് ചൈനീസ് ശാസ്ത്രജ്ഞര്
കൊറോണ വൈറസിനെക്കുറിച്ച് ആദ്യം മുന്നറിയിപ്പ് നല്കിയ വുഹാനിലെ ഡോക്ടര് ലി വെന്ലിയാങ് വെള്ളിയാഴ്ച മരണത്തിന് കീഴടങ്ങിയിരുന്നു. ലി രോഗബാധയെക്കുറിച്ച് മുന്നറിയിപ്പ് നല്കിയപ്പോള് അധികൃതര് അദ്ദേഹത്തെ ഭീഷണിപ്പെടുത്തുകയായിരുന്നു.