നഗരത്തെയാകെ വിഴുങ്ങിയ അഗ്നിനാളം
കാലിഫോര്ണിയയെയാകെ വിഴുങ്ങുന്ന തരത്തിലാണ് കാട്ടുതീ പടരുന്നത്. ആയിരക്കണക്കിന് ജനങ്ങളെയാണ് സുരക്ഷിത കേന്ദ്രങ്ങളിലേക്ക് മാറ്റേണ്ടി വന്നത്. ഹെക്ടര് കണക്കിന് പ്രദേശത്താണ് തീ പടരുന്നത്. തീയണയ്ക്കാനുള്ള കഠിന പ്രയത്നത്തിലാണ് അഗ്നിരക്ഷാ സൈനികര്. പ്രാദേശികമായി അഗ്നിരക്ഷാ പ്രവര്ത്തകര് കാലിഫോര്ണിയയിലെ കാട്ടുതീയ ആപ്പിള് ഫയര് എന്നാണ് വിളിക്കുന്നത്. തെക്കന് കാലിഫോര്ണിയയിലെ ചെറി വാലിയിലാണ് വെള്ളിയാഴ്ച ആദ്യം തീ പടരാന് തുടങ്ങിയത്. ചെറി വാലിയില് നിന്ന് തുടങ്ങിയ കാട്ടുതീ കിഴക്കന് അതിര്ത്തിയിലെ ലോസ് ആഞ്ചലസ് നഗരം വരയെത്തി.
വീടില്ലാതായത് ആയിരക്കണക്കിന് കുടുംബങ്ങള്ക്ക്
3000-ഓളം വീടുകളാണ് അഗ്നിക്കിരയായത്. 2586 വീടുകള് പൂര്ണമായി കത്തിനശിച്ചതായി കാലിഫോര്ണിയ പ്രാദേശിക ഭരണകൂടം അറിയിച്ചു. 8000-ഓളം ആളുകളെയാണ് തീപ്പിടിത്തമുണ്ടായ പ്രദേശങ്ങളില് നിന്ന് സുരക്ഷിത കേന്ദ്രങ്ങളിലേക്ക് മാറ്റിയതെന്ന് കാലിഫോര്ണിയയിലെ ഫയര് ഡിപ്പാര്ട്ട്മെന്റ് അറിയിച്ചു. ചെറി വാലിയിലും ബ്യൂമോണ്ട് സിറ്റിയിലുമാണ് വെള്ളിയാഴ്ചയാണ് തീപ്പിടിത്തം തുടങ്ങിയത്. മൂന്ന് ദിവസം പിന്നിടുമ്പോള് ഹെക്ടര് കണക്കിന് ഭൂമിയാണ് കത്തിനശിച്ചത്. തീയണയ്ക്കാനുള്ള ശ്രമങ്ങള് ഊര്ജിതമായി നടക്കുന്നുണ്ടെങ്കിലും കൂടുതല് പ്രദേശങ്ങളിലേക്ക് ആളിപ്പടരുകയാണ്.
അഗ്നി വിഴുങ്ങിയത് 20000-ലേറെ ഏക്കര് ഭൂമി
മൂന്ന് ദിവസത്തിലേറെയായി പടരുന്ന തീയില് നശിച്ചത് 20000-ലേറെ ഏക്കര് ഭൂമിയാണ്. സാന് ബെര്ണാര്ഡിനോ മുതല് കിഴക്കന് അതിര്ത്തിയിലെ ലോസ് ആഞ്ചലസ് വരെയുള്ള പ്രദേശങ്ങളാണ് അഗ്നി വിഴുങ്ങിയത്. 20516 ഏക്കര് പ്രദേശത്താണ് തീ പടര്ന്നത്. ആദ്യത്തെ ദിവസം തന്നെ 13000 ഏക്കര് പ്രദേശത്ത് തീയെത്തി. ഒരു വശത്ത് രക്ഷാപ്രവര്ത്തനവും തീയണയ്ക്കാനുള്ള ശ്രമവും തുടരുന്നതിനിടെയാണ് തീ കൂടുതല് പ്രദേശങ്ങളിലേക്ക് പടരുന്നത്. കാലിഫോര്ണിയയില് മുമ്പും കാട്ടുതീ ഉണ്ടായിട്ടുണ്ടെങ്കിലും ഇത്രയും രൂക്ഷമാകുന്നത് വര്ഷങ്ങള്ക്ക് ശേഷമാണ്.
106 ഡിഗ്രി ചൂട്, പുക നിറഞ്ഞ് ആകാശം
ഹെലികോപ്റ്ററുകള് ഉപയോഗിച്ചും അഗ്നിരക്ഷാ സൈനികര് നേരിട്ടും തീയണയ്ക്കാനുള്ള കഠിന ശ്രമമാണ് നടത്തുന്നത്. എന്നാല് ദിവസങ്ങളായി തുടരുന്ന കാട്ടുതീയില് പ്രദേശത്താകെ താപനില കുത്തനെ ഉയര്ന്നു. 106 ഡിഗ്രി സെല്ഷ്യസാണ് കാലിഫോര്ണിയില് നിലവിലെ അന്തരീക്ഷ താപനില. ആകാശം നിറയെ പുകയാണ്. വളരെ അകലെ നിന്നു തന്നെ തീയും പുകയും ആകാശത്ത് നിറഞ്ഞിരിക്കുന്നത് കാണാനാകും. വരും ദിവസങ്ങളിലും മേഖലയിലെ വായു മലിനീകരണ തോത് കൂടുമെന്നും ആളുകള് പുറത്തിറങ്ങരുതെന്നും കാലാവസ്ഥാ വിഭാഗം നിര്ദേശം നല്കിയിട്ടുണ്ടെന്ന് ഫോക്സ് 11 റിപ്പോര്ട്ട് ചെയ്തു. പുക നിറഞ്ഞ കാലിഫോര്ണിയയുടെ ചിത്രങ്ങളും വീഡിയോകളും സമൂഹ മാധ്യമങ്ങളില് പ്രചരിക്കുന്നുണ്ട്.
ഫ്ലോറിഡ തീരം ലക്ഷ്യമിട്ട് കൊടുങ്കാറ്റ്
കൊറോണ വൈറസ് പടര്ന്നുപിടിക്കുന്ന ഫ്ലോറിഡ കൊടുങ്കാറ്റ് ഭീഷണിയിലാണ്. ഇസയാസ് കൊടുങ്കാറ്റ് ഫ്ലോറിഡ തീരം ലക്ഷ്യമിട്ട് നീങ്ങുന്നതായാണ് കാലാവസ്ഥാ വിഭാഗം മുന്നറിയിപ്പ് നല്കുന്നത്. ചുഴലിക്കാറ്റ് ശക്തി കുറഞ്ഞ് ഉഷ്ണമേഖലാ കാറ്റായാണ് വീശുന്നത്. ടര്ക്സ് ആന്ഡ് കയ്കോസ് ദ്വീപുകളെയും ബഹമാസിനെയും ലക്ഷ്യമിട്ടാണ് കാറ്റ് നീങ്ങുന്നത്. സംസ്ഥാന അധികൃതര് അഭയകേന്ദ്രങ്ങള് തുറക്കുകയും ബീച്ചുകളും പാര്ക്കുകളും അടയ്ക്കുകയും ചെയ്തിട്ടുണ്ട്. ആളുകള് ജാഗ്രത പാലിക്കണമെന്ന് നിര്ദേശം നല്കിയിട്ടുമുണ്ട്. കൊവിഡിന്റെ രണ്ടാം വരവില് ഏറ്റവും കൂടുതല് കേസുകള് റിപ്പോര്ട്ട് ചെയ്ത സംസ്ഥാനമാണ് ഫ്ലോറിഡ. ഞായറാഴ്ച മാത്രം 7104 പേര്ക്കാണ് രോഗം സ്ഥിരീകരിച്ചത്. ഇതോടെ സംസ്ഥാനത്തെ ആകെ രോഗികളുടെ എണ്ണം 487000 കടന്നു.