തെറ്റൊന്നും ചെയ്യാത്തതിന് രണ്ടുപേരെ അറസ്റ്റ് ചെയ്‍തു

രണ്ടു സുഹൃത്തുക്കള്‍ ചേര്‍ന്ന് ഒരു റസ്റ്റോറന്‍റില്‍ ചായ കുടിക്കാന്‍ എത്തുന്നു. മൂന്നാമനായ സുഹൃത്ത് വരുന്നതിനായി കാത്തിരിക്കുന്നു. ഇതിനിടയില്‍ ഹോട്ടല്‍ ജീവനക്കാര്‍ പോലീസിനെ വിളിക്കുന്നു, കാരണം - രണ്ടുപേര്‍ പ്രത്യേകിച്ച് ഒന്നും ഓര്‍ഡര്‍ ചെയ്യാതെ റസ്റ്റോറന്‍റില്‍ ഇരിക്കുന്നു. സുഹൃത്തിനെ കാത്തുനില്‍ക്കുകയാണെന്ന് രണ്ടുപേരും വിശദീകരിച്ചെങ്കിലും പോലീസ്, റസ്റ്റോറന്‍റ് ജീവനക്കാരുടെ സഹായത്തോടെ ഇരുവരെയും വിലങ്ങണിയിച്ച് പുറത്തേക്ക് കൊണ്ടുപോകുന്നു.

മുകളില്‍ പറയുന്നത് കഥയല്ല, സംഭവമാണ്. കഴിഞ്ഞ ദിവസം അമേരിക്കന്‍ നഗരമായ ഫിലാഡല്‍ഫിയയില്‍ ആണ് ഇത് സംഭവിച്ചത്. പോലീസ് അറസ്റ്റ് ചെയ്‍ത രണ്ടുപേരും കറുത്ത വര്‍ഗ്ഗക്കാരാണ്. അമേരിക്ക അവരുടെ കറുത്ത പൗരന്മാരോട് പെരുമാറുന്ന രീതികളില്‍ ഒന്നിന്‍റെ ഉദാഹരണമാണിതെന്ന് വിമര്‍ശകര്‍ ആരോപിക്കുന്നു.



വംശീയ അധിക്ഷേപമെന്ന് സോഷ്യല്‍ മീഡിയയില്‍ വ്യാപകമായി വിമര്‍ശിക്കപ്പെടുന്ന ഈ സംഭവം ഉണ്ടായത് ലോക പ്രശസ്‍ത റസ്റ്റോറന്‍റ് ശൃംഖലയായ സ്റ്റാര്‍ബക്സ് ഔട്ട്ലെറ്റിലാണ്.



സ്റ്റാര്‍ബക്സില്‍ നടന്ന സംഭവങ്ങള്‍ അതുപോലെ തന്നെ മറ്റു ചില ഉപയോക്താക്കള്‍ വീഡിയോയില്‍ പകര്‍ത്തി. ഇത് സോഷ്യല്‍ മീഡിയയില്‍ വൈറലായി. ഇതോടെ നാണംകെട്ട സ്റ്റാര്‍ബക്സ് മാപ്പ് അപേക്ഷയുമായി എത്തി. തൊട്ടുപിന്നാലെ ഫിലാഡല്‍ഫിയ പോലീസും തങ്ങളുടെ നടപടി പരിശോധിക്കുമെന്ന് അറിയിച്ചു.