സല്‍മാന്‍ രാജാവി‍ന്‍റെ അംഗരക്ഷകന്‍ വെടിയേറ്റ് മരിച്ചു

ജിദ്ദ: സൗദി അറേബ്യ ഭരണാധികാരി സല്‍മാന്‍ രാജാവിന്‍റെ അംഗരക്ഷകന്‍ മേജര്‍ ജനറല്‍ അബ്‍ദുല്‍ അസീസ് അല്‍ ഫാഗം വെടിയേറ്റ് മരിച്ചു. വ്യക്തിപരമായ തര്‍ക്കത്തെ തുടര്‍ന്നാണ് വെടിയേറ്റതെന്ന് ഭരണകൂടം ഔദ്യോഗിക വാര്‍ത്താ ചനലിലൂടെ അറിയിച്ചു.

ജിദ്ദയിലെ റെഡ് സീയിലുണ്ടായ വെടിവെപ്പിലാണ് അല്‍ ഫാഗം കൊല്ലപ്പെട്ടത്. സംഭവത്തില്‍ ഏഴുപേര്‍ക്ക് പരിക്കേല്‍ക്കുകയും ചെയ്‍തു. ഫാഗം ജിദ്ദയിലുള്ള തന്‍റെ സുഹൃത്തിന്‍റെ വീട്ടിലേക്ക് പോയതായിരുന്നുവെന്നും അവിടെ വെച്ചാണ് വെടിയേറ്റതെന്നും പോലീസ് പറഞ്ഞു.

എപ്പോഴും സല്‍മാന്‍ രാജാവിന്‍റെ ഒപ്പമുണ്ടാകുന്ന അല്‍ ഫാഗം സൗദി ജനതയ്ക്ക് സുപരിചിതനാണ്. ഫാഗത്തിന്‍റെ മരണത്തില്‍ നിരവധിയാളുകള്‍ അനുശോചിച്ചു.

താങ്കള്‍ ഞങ്ങളുടെ പ്രിയപ്പെട്ടവന് സുരക്ഷയൊരുക്കി. താങ്കളെ ഞങ്ങള്‍ സ്നേഹിക്കുന്നു എന്നാണ് യു.എ.ഇ.യിലെ സൗദി സ്ഥാനപതി ട്വീറ്റ് ചെയ്‍തത്. അല്‍ ഫാഗം ഒരു ഹീറോയായി ജീവിച്ചു. തികഞ്ഞ രാജ്യസ്നേഹിയായിരുന്നു. തന്‍റെ രാജ്യത്തെയും രാജാവിനെയും അദ്ദേഹം സ്നേഹിച്ചു. ധര്‍മബോധമുള്ള ഉദ്യോഗസ്ഥനായിരുന്നുവെന്നും അദ്ദേഹം കുറിച്ചു.