ശിക്ഷ വിധിക്കുന്നതിനിടെ പ്രതി കോടതിയിൽ വിഷം കഴിച്ച് മരിച്ചു

ഹേഗ്: ശിക്ഷാ വിധി പ്രഖ്യാപിക്കുന്നതിനിടെ കേസിലെ പ്രതി കോടതിമുറിയിൽ വെച്ച് വിഷം കഴിച്ച് മരിച്ചു. ഹേഗിലെ അന്താരാഷ്ട്ര നീതിന്യായ കോടതിയിലാണ് നാടകീയ സംഭവങ്ങൾ ഉണ്ടായത്. മുന്‍ ബോസ്നിയന്‍ കമാന്‍ഡര്‍ സ്ലൊബൊഡാന്‍ പ്രല്‍ജാക്കാ(72)ണ് ആത്മഹത്യ ചെയ്തത്.

ബോസ്നിയൻ യുദ്ധത്തിനിടെ മുസ്ലിങ്ങളെ കൂട്ടക്കൊല ചെയ്ത കേസിൽ കുറ്റവാളിയായിരുന്നു പ്രൽജാക്ക്. 1992-95 കാലഘട്ടത്തിലാണ് കേസിനാസ്പദമായ സംഭവം. 2013ൽ അദ്ദേഹത്തിനെ 20 വർഷം തടവിന് കോടതി ശിക്ഷ വിധിച്ചിരുന്നു. ഇതിനെതിരെയാണ് പ്രൽജാക്ക് അന്താരാഷ്ട്ര നീതിന്യായ കോടതിയെ സമീപിച്ചത്.

"ഞാൻ യുദ്ധക്കുറ്റവാളിയല്ല. ഈ വിധി ഞാൻ അംഗീകരിക്കില്ല. ദാ.. ഞാൻ വിഷം കഴിക്കുകയാണ്" എന്ന് പറഞ്ഞാണ് കേസിൽ വിധി പറയുന്നതിനിടെ അദ്ദേഹം വിഷം കഴിച്ചത്. ഉടൻ തന്നെ കോടതി നിർത്തി വെച്ച് അദ്ദേഹത്തെ ആശുപത്രയിൽ എത്തിച്ചെങ്കിലും രക്ഷിക്കാനായില്ല.