റാലിക്കിടെ ട്രംപിന് നേരെ വധശ്രമം

ലോസ് ആഞ്ചലസ്: അമേരിക്കൻ പ്രസിഡൻറ് സ്ഥാനാർഥി ഡൊണാള്‍ഡ് ട്രംപിന് നേരെ വധശ്രമം.ബ്രിട്ടീഷ് വംശജനായ മൈക്കേൽ സാൻഫോർഡാ(19)ണ് ലാസ് വേഗാസിൽ നടന്ന റാലിക്കിടെ പോലീസ് ഉദ്യോഗസ്ഥന്‍റെ തോക്ക് പിടിച്ചുവാങ്ങി വെടിവെക്കാൻ ശ്രമിച്ചത്.

കാലിഫോര്‍ണിയയിൽ നിന്നും ട്രംപിനെ കൊല്ലുക എന്ന ഉദ്ദേശ്യത്തോടെയാണ് മൈക്കേൽ ലാസ് വേഗാസിൽ എത്തിയത്. ലാസ് വേഗാസിലെ ശ്രമം പരാജയപ്പെട്ടാൽ പിന്നീട് ട്രംപിനെ വധിക്കുന്നതിനായി ഫിനിക്സിലെ റാലിയുടെ ടിക്കറ്റും ഇയാള്‍ ശേഖരിച്ചിരുന്നതായി പോലീസ് പറഞ്ഞു.

റാലിയിൽ തോക്കുമായി പ്രവേശിക്കുന്നത് സുരക്ഷിതമല്ലാത്തതിനാലാണ് ഉദ്യോഗസ്ഥന്‍റെ തോക്ക് പിടിച്ചെടുക്കാൻ ശ്രമിച്ചതെന്നാണ് പോലീസിന്‍റെ നിഗമനം.

എന്നാൽ ഒരു വർഷത്തോളമായി തന്‍റെ ലക്ഷ്യമാണ് ഇതെന്നും അവസരം ലഭിച്ചാൽ ഇനിയും ട്രംപിനെ വധിക്കാൻ ശ്രമിക്കുമെന്നും യുവാവ് പറഞ്ഞു.