ബാങ്കോക്ക്: ലോകമൊട്ടാകെ ചര്‍ച്ചാ വിഷയമായി തീര്‍ന്ന തായ്‌ലാന്‍ഡിലെ താം ലുവാങ് ഗുഹ മ്യൂസിയമാക്കുന്നു. 17 ദിവസത്തെ ആശങ്കയ്ക്കും മൂന്നു ദിവസത്തെ അതിസാഹസികമായ രക്ഷാ ദൗത്യത്തിനുമൊടുവിലാണ് 12 കുട്ടികളെയും അവരുടെ ഫുട്ബാള്‍ കോച്ചിനെയും ഗുഹയില്‍ നിന്ന് ഹോളിവുഡ് സിനിമകളെ പോലും വെല്ലുന്ന വിധത്തില്‍ അതിസാഹസികമായി പുറത്തെത്തിച്ചത്.

രണ്ടാഴ്ച്ചയോളം കോച്ചും കുട്ടികളും പ്രതീക്ഷകളോടെ കഴിഞ്ഞ ഗുഹ തായ്‌ലന്റിലെ വിനോദ സഞ്ചാരികളുടെ പ്രധാന ആകര്‍ഷണമാകുമെന്നാണ് കരുതുന്നത്. രക്ഷാപ്രവര്‍ത്തന രീതികള്‍ എങ്ങനെയായിരുന്നെന്നും മറ്റും വ്യക്തമാക്കുന്നതായിരിക്കും മ്യൂസിയം എന്നാണ് സൂചന.

അതേസമയം വര്‍ഷം മുഴുവന്‍ മ്യൂസിയം തുറക്കുമോ എന്ന കാര്യത്തില്‍ തീര്‍ച്ചയായിട്ടില്ല. മണ്‍സൂണ്‍ സീസണില്‍ കനത്ത മഴയുടെ പശ്ചാത്തലത്തില്‍ തായ്‌ലന്റിന്റെ പലഭാഗങ്ങളും വെള്ളപ്പൊക്കഭീഷണി നേരിടാറുണ്ട്.

ഈ സാഹചര്യത്തില്‍ ഏതൊക്ക സമയങ്ങളില്‍ മ്യൂസിയം അടച്ചിടണം എന്ന എന്ന കാര്യത്തില്‍ തീരുമാനമായിട്ടില്ല. വിനോദസഞ്ചാരികളുടെ സുരക്ഷയ്ക്കായി ഗുഹയ്ക്കകത്തും പുറത്തും മുന്‍കരുതല്‍ കൈക്കൊള്ളുമെന്ന് പ്രധാനമന്ത്രി പ്രയുത് ചാന്‍ ഒച്ചാ പറഞ്ഞു.

തായ് ഗുഹാ ദൗത്യത്തെ ആസ്പദമാക്കി വമ്പന്‍ സിനിമകളൊരുക്കാന്‍ ഇതിനകം സിനിമാ കമ്പനികള്‍ ഒരുങ്ങിക്കഴിഞ്ഞു. ജൂണ്‍ 23-നാണ് 16 വയസില്‍ താഴെയുള്ളവരുടെ ഫുട്‌ബോള്‍ ടീമിലെ അംഗങ്ങളായ കുട്ടികളും അവരുടെ പരിശീലകനുമടക്കം 13 പേര്‍ കനത്തമഴയെയും മണ്ണിടിച്ചിലിനെയും തുടര്‍ന്ന് ഗുഹയില്‍ കുടുങ്ങിയത്.