മൊബൈൽ ഫോൺ സ്ക്രീനിലും കറൻസിയിലും കൊവിഡ് വൈറസ് '28 ദിവസം വരെ നിലനിൽക്കും'

അധികം വെളിച്ചം കടക്കാത്ത സാഹചര്യത്തിലുള്ള ഇടങ്ങളിൽ 20 ഡിഗ്രി സെൽഷ്യസിൽ (68 ഡിഗ്രി ഫാരൻഹീറ്റ്) കൊവിഡ്-19 വൈറസ് 28 ദിവസം വരെ നിലനിൽക്കുമെന്നാണ് ശാസ്ത്രജ്ഞർ കണ്ടെത്തിയിരിക്കുന്നത്. മൊബൈൽ ഫോൺ സ്ക്രീനുകൾ പോലുള്ള സുഗമമായ പ്രതലങ്ങളിലും ഗ്ലാസ്, കറന്‍സി, സ്‌റ്റെയിന്‍ലസ് സ്റ്റീലിലുമെല്ലാം വൈറസിന് ഇത്രയും കാലം നിലനിൽക്കാനാകുമെന്നാണ് പഠനം വ്യക്തമാക്കുന്നത്. വൈറോളജി ജേണലില്‍ ഈ പഠനം പ്രസിദ്ധീകരിച്ചിട്ടുണ്ട്. അതേസമയം ശക്തമായ പ്രകാശമുള്ള സ്ഥലത്തല്ല ഈ പഠനം നടന്നത് എന്നും ഗവേഷകര്‍ വ്യക്തമാക്കിയിട്ടുണ്ട്.

കൂടുതല്‍ താപനിലയില്‍ വൈറസിന് അതിജീവിക്കാന്‍ ചിലപ്പോള്‍ സാധിക്കില്ലെന്ന് പഠനം വ്യക്തമാക്കുന്നതായാണ് വാർത്താ ഏജൻസിയായ എഎഫ്പി റിപ്പോർട്ട് ചെയ്യുന്നത്. അധികം പ്രകാശം ഇല്ലാത്ത ഇടങ്ങളിൽ 30 ഡിഗ്രി സെൽഷ്യസിൽ (86 ഡിഗ്രി ഫാരൻഹീറ്റ്), വൈറസിന്‍റെ അതിജീവന നിരക്ക് ഏഴു ദിവസമായി കുറയുകയും 40 ഡിഗ്രി സെൽഷ്യസിൽ (104 ഡിഗ്രി ഫാരൻഹീറ്റ്) വെറും 24 മണിക്കൂറായി കുറയുകയും ചെയ്യുമെന്നാണ് പഠനം പറയുന്നത്.

പരുത്തി പോലുള്ള പ്രതലങ്ങളിൽ ചെറിയ കാലയളവിൽ വൈറസ് നിലനിൽക്കുമെന്നും പഠനം ചൂണ്ടിക്കാട്ടുന്നു. ഏറ്റവും കുറഞ്ഞ താപനിലയിൽ 14 ദിവസം വരെയും ഏറ്റവും ഉയർന്ന താപനിലയിൽ 16 മണിക്കൂറിൽ താഴെയുമാണ് ഇത്തരം പ്രതലങ്ങളിൽ കൊവിഡ്-19 വൈറസിനെ അതിജീവിന ശേഷിയെന്നാണ് ശാസ്ത്രജ്ഞർ ചൂണ്ടിക്കാട്ടുന്നത്

വൈറസ് നിലനിൽക്കുന്ന ഇത്തരം പ്രതലങ്ങളിലും വസ്തുക്കളിലും സ്പർശിക്കുന്ന ഒരാൾ പിന്നീട് വായിലോ, കണ്ണുകളിലോ, മൂക്കിലോ തൊടുകയാണെങ്കിൽ വൈറസ് ബാധിതനാകുമെന്ന മുന്നറിയിപ്പാണ് പഠനത്തിൽ പങ്കെടുത്ത ഓസ്ട്രേലിയൻ സെന്റർ ഫോർ ഡിസീസ് ഡയറക്ടർ ട്രെവർ ഡ്രൂ പറയുന്നത്. കൈകൾ കൃത്യമായ ഇടവേളകളിൽ കഴുകുകന്നത് തന്നെയാണ് ഇത്തരത്തിൽ വൈറസ് ബാധയേൽക്കാതിരിക്കാനുള്ള പ്രധാന വഴിയെന്ന് തന്നെയാണ് ശാസ്ത്രജ്ഞർ ചൂണ്ടിക്കാട്ടുന്നത്.