ബെയ്‍ജിങ്: കൊവിഡ് 19 (കൊറോണ വൈറസ്) ബാധിച്ച് മരണസംഖ്യ വീണ്ടും ഉയരുന്നു. വ്യാഴാഴ്‍ച മരിച്ചത് 121 പേരാണ്. ഇതോടെ ആകെ മരണസംഖ്യ 1488 ആയി.
വ്യാഴാഴ്‍ച ജപ്പാനില്‍ കൊറോണ വൈറസ് ബാധിച്ച 80 വയസ്സുകാരി മരിച്ചിരുന്നു. ചൈനയ്ക്ക് പുറത്ത് കൊറോണ വൈറസ് ബാധിച്ച് മരണം റിപ്പോര്‍ട്ട് ചെയ്യുന്ന മൂന്നാമത്തെ രാജ്യമാണ് ജപ്പാന്‍. ഹോങ്കോങ്ങിലും ഫിലിപ്പീന്‍സിലും ഒരാള്‍ വീതം നേരത്തെ മരിച്ചിരുന്നു.
വ്യാഴാഴ്‍ച 4823 പേര്‍ക്ക് കൂടി വൈറസ് ബാധ സ്ഥിരീകരിച്ചു. 65000 ത്തോളം ആളുകള്‍ക്കാണ് ഇതുവരെ വൈറസ് ബാധ സ്ഥിരീകരിച്ചിരിക്കുുന്നത്. വൈറസിന്‍റെ പ്രഭവകേന്ദ്രമായ വുഹാന്‍ ഉള്‍പ്പെട്ട ഹുബെയ് പ്രവിശ്യയില്‍ മാത്രം 51 986 പേര്‍ക്കാണ് രോഗം സ്ഥിരീകരിച്ചത്.
Also Read: ചൈനയില്‍ കമ്മ്യൂണിസ്റ്റ് പാര്‍ട്ടി നേതാക്കളെ പുറത്താക്കി; കൊറോണയെ നേരിടാന്‍ പുതിയ നേതൃത്വം
ചൈനയ്ക്ക് പുറമെ 25 രാജ്യങ്ങളിലാണ് ആളുകള്‍ കൊറോണ വൈറസ് ബാധിച്ച് ചികിത്സയില്‍ കഴിയുന്നത്. ഭയം അവസാനിച്ചിട്ടില്ലെന്നും ജാഗ്രത തുടരണമെന്നും വ്യാഴാഴ്‍ചയും ലോകാരോഗ്യ സംഘടന മുന്നറിയിപ്പ് നല്‍കിയിരുന്നു. ഇതുവരെ വൈറസ് ബാധ റിപ്പോര്‍ട്ട് ചെയ്‍തിട്ടില്ലാത്ത രാജ്യങ്ങളും ജാഗ്രത പാലിക്കണമെന്ന് ഡബ്ല്യുഎച്ച്ഒ ഡയറക്ടര്‍ ജനറല്‍ ടെഡ്രോസ് അധനോം ഗബ്രെയെസസ് പറഞ്ഞു.