കൊവിഡ് വൈറസിന്റെ ഉറവിടം വുഹാൻ ലബോറട്ടറി; തെളിവുണ്ടെന്ന് ചൈനീസ് വൈറോളജിസ്റ്റ്

ബെയ്‌ജിങ്ങ്: കൊവിഡ്-19 വൈറസ് നിർമ്മിച്ചത് വുഹാനിലെ ലബോറട്ടറിയിലാണെന്ന് ചൈനീസ് വൈറോളജിസ്റ്റ്. ലി-മെങ് യാൻ എന്ന വൈറോളജിസ്റ്റാണ് വെളിപ്പെടുത്തൽ നടത്തിയിരിക്കുന്നത്. വുഹാൻ നഗരത്തിലെ വൈറോളജി ലാബാണ് വൈറസിന്റെ ഉറവിടമെന്നും തന്റെ പക്കൽ തെളിവുണ്ടെന്നും അവർ വ്യക്തമാക്കി.

Also Read: 'ഞങ്ങളെ നിങ്ങൾ കാൻസർ രോഗികളാക്കി, നഷ്ടപരിഹാരം തരൂ'; അരിസോണ സ്വദേശികളുടെ പോരാട്ടം

"ജീനോം സീക്വൻസ് (Genome Sequence) ഒരു മനുഷ്യന്റെ വിരലടയാളം പോലെയാണ്." യൂട്യൂബ് വീഡിയോയിൽ അവർ അവകാശപ്പെട്ടു. വൈറസ് വ്യാപനം പൊതുവിൽ അംഗീകരിക്കുന്നതിനു മുമ്പുതന്നെ ചൈനീസ് സർക്കാരിന് ഇതേപ്പറ്റി അറിയാമായിരുന്നു എന്നാണ് വൈറോളജിസ്റ്റ് പറയുന്നത്. ഹോങ്കോങ്ങിലെ സ്കൂൾ ഓഫ് പബ്ലിക്ക് ഹെൽത്തിലാണ് ഇവർ ജോലി ചെയ്തിരുന്നതെന്നാണ് ഐടിവിയുടെ 'ലൂസ് വുമൺ ടോക്ക്' വ്യക്തമാക്കിയിരിക്കുന്നത്. രഹസ്യ കേന്ദ്രത്തിൽ നിന്നാണ് ലി മെങ് യാൻ പരിപാടിയിൽ പങ്കെടുത്തിരിക്കുന്നത്.

തന്റെ സുരക്ഷയ്ക്കു വേണ്ടിയാണ് താൻ യുഎസിലേക്ക് പലായനം ചെയ്തതെന്നും തന്റെ കണ്ടെത്തൽ ലോകത്തെ അറിയിക്കാൻ ആഗ്രഹിക്കുകയാണെന്നും അവർ പറഞ്ഞു. ഹോങ്കോങ്ങിലെ സ്കൂൾ ഓഫ് ഹെൽത്തിൽ ജോലി ചെയ്യുന്നതിനിടെ ഡിസംബർ 31ന് തന്നോട് വുഹാനിലെ സാർസ് പോലുള്ള വൈറസിനെപ്പറ്റി അന്വേഷിക്കാൻ ആവശ്യപ്പെട്ടിരുന്നു. പിന്നീട് ഇതേപ്പറ്റി മൗനം പാലിക്കാനുള്ള നി‍ര്‍ദ്ദേശമാണ് ലഭിച്ചത്.

Also Read: ആബെയ്‍ക്ക് പിന്‍ഗാമി, വിശ്വസ്‍തന്‍ യോഷിഹിഡെ സുഗ പുതിയ ജപ്പാന്‍ പ്രധാനമന്ത്രി

രാജ്യം വിടുന്നതിനു മുമ്പ് തന്നെ പിരിച്ചുവിട്ടതായാണ് ചൈന വ്യക്തമാക്കുന്നത്. അവ‍ര്‍ തന്നെപ്പറ്റിയുള്ള എല്ലാ വിവരങ്ങളും നശിപ്പിച്ചു. ഇപ്പോൾ തന്നെപ്പറ്റി കിംവദന്തികൾ പ്രചരിപ്പിക്കുകയാണെന്നും ലി മെങ് യാൻ പറയുന്നു.